Jowai, Nailur 25
Ka Ïawpynsin Wahïajer bad ka Maïa Club Umjlasiaw ki la jam sha ka semi-final jong ka lympung ïalehkai 2nd Division Football Tournament ba la pynïaid da ka Thadlaskeiñ Sports Association (TSA), hadien ba ki la khur jingjop ha ka sngi Palei.
Ha ka jingïakhun kaba la long ha Wahïajer Multi Sports Complex, ka Ïawpynsin Wahïajer ka la pynliem noh ïa ka Thadmusem da 1-0 kol bad kawei ka la wan lyngba u Owan Phawa ha ka minit kaba 56.
Ha ka jingïalehkai kaba bud, ka Maïa Club Umjlasiaw ka la jop da 4-3 kol ïa ka Madur SC lyngba ka tie-breaker hadien ba kine ki kynhun kim shym la lah ban thep kol haduh ka por ba la buh.
Ha ka sngi Thohdieng ka semi-final (Eliminator-Super Division) kan long hapdeng ka Wahïajer pyrshah ïa ka Nongkhroh Rim ha ka por 2.30 baje nohphai sngi.
