Shillong, Nailur 25
Ka Green Heart Boxing Club ka la sdang ïa ka rynsan ïakura ba la tip kum ka Invitational Boxing Competition 2025 ha ka sngi Palei ha Indoor Sport Hall, Mawlai Mawroh, Shillong.
Ha kane ka rynsan ïakura ka ban neh haduh ar sngi kynthih, ki la don kumba 80 ngut ki nongïakura kynthei bad shynrang ki ban shim bynta ha kane ka lympung ka ban don kumba 18 ki kyrdan ïalehkai.
Hashwa ban sdang ïa kane ka rynsan ïakura, la wan da u Block Development Officer ka Mylliem u Bah Tosan Marweiñ kum u kongsan, ha ryngkat ka jingdon lang u Bah Pynsuklang Hynñiewta, Secretary ka Dorbar Shnong Mawlai Mawroh kum u symbud kongsan kumjuh ki nongïalam ka Meghalaya Boxing Association ba kynthup ïa u President u Bah Cornelius Kharhunai nalor u President ka Green Heart Boxing Club u Bah Larry Kharpran bad kiwei kiwei.
Ka jingthmu jong kane ka rynsan ïakura ka long shi bynta jong ka jingpynkhreh na ka bynta ka National Games 2027 ka ban sa long hapoh ka Jylla Meghalaya bad la kyrshan lang ïa kane ka jingïakura da ka District Sport Promotion Society (DSPS).
Haba ai jingkren ha kane ka sngi, u Bah Tosan u la pynpaw ïa ka jingkmen ban ïadon bynta lang ha kane ka jingïakura. “Nga dei u briew uba ju sngewtynnad eh ïa kane ka jingïakura, kumta nga pynshlur ïa phi ba phin long kiba trei shitom khnang ba phi ïoh ka lad ban ïashim bynta ha ka National Games 2027”
“Ka jingïakura kam shong ha ka jingheh jong ki nongïakura, hynrei ka shong ha ka mynsiem ïakhun khlem da kynran dien na kane ka jingïalehkai. Ki dei ban long kiba trei shitom, kiba biang ha ka discipline bad ruh ki dei ban long ki nuksa ba bha ïa kiwei khnang ba kin lah ban kynjoh sha ka thong.”
Haba phai sha ka jingïakura jong kane ka sngi sdang, ha ka liang ki shynrang (senior) la khur jingjop da u Sanjeev Maskut (50kg), Khrawbok Marweiñ (50kg), Lamshai Rani (55kg), Sunil Limbu (55kg) bad u Salirang Marak (70kg). Katba ha ka liang ki kynthei la jop da ka Ekyrpangmeka Sohïong (48kg), Sonia Tamang (48kg), Banisha Makri (51kg), Melbarine Swer (54kg) bad ka Sanphika Mynsong (57kg).
Haba phai ha ka liang ki khynnah la jop da ka Saneza Syiemlieh (44kg) bad ka Remika L Nonglait (48kg) ha ka liang ki kynthei. Katba ha ka liang ki khynnah shynrang la jop da u Damonlang Marbaniang (44kg), Banchan Meki Pyrtuh (46kg), Kyrshan Swer (48kg), Banrap Syiem Malngiang (50kg), Arkimenbha Rimen (50kg), Erickson Kahit (57kg), Jarapskhem Rani (57kg), Mack L Marshillong (60kg), Brave Kharmyndai (60kg), Mankhrawkupar Khartiewksiar (75kg) bad u Fready Madur (75kg).
