Shillong, Nailur 25
Ki kam tuh kam thiem ki la nangjur bad bteng na kawei ka sngi sha kawei pat bad ïa kane la sakhi biang na ka jingshah tuh jong ki ar shaka, shah prong tuh ki ïing bad kiwei ki kam tuh na kylleng ki jaka.
Katkum ka khubor na ki pulit la ong ba ka Sushmita Jana ka la ai ka jingujor ba ha ka 19 tarik mynta u bnai, ki runar bym lah ban ithuh ki la prong tuh hapoh ka ïing ba ka shong sah wai ha 4th Furlong bad ban rah tuh ïa kawei ka Laptop kaba shongdor kumba T.34,990/-.
Ha kawei pat ka khubor u Bah Gabriel Jana u la ai ka jingujor ba ha ka miet jong ka 21 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AA-5983 na ka thaiñ Demseiñïong, Shillong.
U Parveen Singh ruh u la ai ka jingujor ba ha ka 19 tarik mynta u bnai, u la lap ba ki runar bym lah ban ithuh, ki la tuh ïa ki ar tylli ki trok kiba don ïa u registration number PB35-Z-0266 bad PB35-Z-0366 na ka shnong Tongseng.
Katba na ka liang jong ka Kong Polidian Nongrang ka la ai ka jingujor ba ha ka 21 tarik mynta u bnai, ha ka por kumba 1.45 mynsngi, ki runar bym lah ban ithuh ki la prong tuh hapoh ka ïing ka jong ka, kaba don ha ka shnong Mawtari Myrdon kaba hap hapoh ka thanad Umsning ha Ri-Bhoi bad ban tuh ïa ka pisa kaba long haduh T.6.6 lak.
