Shillong, Nailur 25
Ka Rangdajied United FC bad ka Laitkor SC ki la ïasam mar shi point ha ka Shillong Premier League 2025, hadien ba kila kut ha ka jingïakhaid da mar 2-2 kol ha ka sngi Palei ha SSA Stadium kaba ha First ground, Polo.
Ha ka jingshisha, ki ar kynhun haba ki la wan ban mih madan ki la don ïa ka jingangnud ban ïakhun ryngkat bad ka jingjop, pynban ha kaba kut jong ka sngi, na ka daw ka jingbym lah than ban pyndonkam ïa ki kabu ksiar ki la hap ban pdiang na ka bynta ban shu ïa sam noh mar shi point.
Haba phai sha ka jingïakhun, dei ka Rangdajied kaba la ïoh ban pynkhih jar nyngkong lyngba u Menangpyndap Khongjee ha ka minit kaba 25, hadien ba u la ïoh ban shut kham jam ïa ka bol nabar ka ‘box’.
Pynban hashwa ba kane ka jingïakhun kan jam sha ka jingshongthait shipor, ka Laitkor SC lyngba u Fridison Wanñiang ka la pynphai kylla ha ka minit kaba 45+2 na ka bynta ban ïakhaid mar 1-1 kol.
Haba la wan ban bteng biang ïa ka jingïalehkai jong ka kylla miet, ka Laitkor SC ka la ïoh ban thep biang ïa ka kol kaba ar lyngba u Giovanni Syiemiong (61) hadien ba une u rangïalehkai u la ïoh ban shut na kyndong.
Ka jinglah ka Laitkor SC ban tam shakhmat ka la pynlong ïa ka kynhun ïalehkai ka Rangdajied United ba kan pyrshang katba lah ban pynphai, hynrei hapdeng jong kane la shem ba kum ka kynhun ka la pynlehnohei de ruh ïa ki katto katne ki kabu ksiar kiba la wan sha ka. Dei tad ha ka minit kaba 84 ba ka la lah ban pynphai kylla lyngba u Denelson Pyngrope, uba la ïoh ïa ka kabu ban pynkhih jar bad kaba la biang pura ïa ka ban lait na ka jingshah rem.
Da kane jingïakhaid ka Laitkor ka dangsah ha ka kyrdan ba basan bad 8 point, katba ka Rangdajied ka la jam shi kyrdan kata sha kaba hynriew hadien ba ka la tam lyngba ka jingïapher ha ka jingthep kol watla ka la ïaryngkat mar 6 point ryngkat ka Malki bad ka Sawmer.
Ka jingïalehkai ha ka sngi Thohdieng kan long hapdeng ka Sawmer SC pyrshah ïa ka Mylliem SC ha ka por 3:30 nohphai sngi.
