Shillong, Nailur 25
U Superintendent of Police (SP) jong ka East Khasi Hills, u Bah Vivek Syiem ha ka kyrwoh khubor ba la pyllait ha ka sngi Palei, u la pyntip ba halor ka khubor shah pynap ka khynnah skul da ka tari ha Nongthym-mai ka dei ka khubor kaba la shu thok da katei ka khynnah skul.
Kum ban pynkynmaw, ha ka 25 tarik u Nailar, 2025, ka la don ka jingjia kaba la jia ha Nongthymmai Beat House ka pynpaw ba kawei ka khynnah skul haba ka la wanphai na skul, ka la kynnoh ba ka la shah tuh pisa 300 tyngka ha ki saw ngut ki briew kiba ym lah ban ithuh, bad uwei na ki, u la pynap da ka tari da kaba byrngem artad ïa ka. Katei ka khynnah ka la pynpaw ruh ba kane ka la jia ha Lumiablot, Nongthymmai, kaba la buh jingma ïa ka.
Ha kajuh ka sngi, la ïoh ïa ka ejahar ha Nongthymmai Beat House bad la pynrung hapoh Rynjah PS case No. 258(8)2025 hapoh ki kyndon aiñ U/S 309(4)/309(6)/351(3)/126(2)/3(5)/3(6) BNS bad la sdang ïa ka jingtohkit. Kane ka jingjia ka la pynmih ka jingsheptieng bad ka jingsngew syier ha ki paidbah.
Hynrei, hadien ka jingtohkit kaba bniah, kaba kynthup ruh ïa ka jingthoh ïa ka jingkren jong ka khynnah skul hakhmat u Magistrate ha District Court, ka khynnah ka la phla ba ka la ai ïa ka pisa sha ka paralok jong ka ban thied tiar online. Namar ka jingsheptieng ba la lut baroh ka pisa, ka la thaw ïa ka khubor ba ka la shah tuh ïa ka pisa. Kumta la pynshai ba ka jingjia kaba ka la kynnoh kam shym la jia satia.
Ha kane ka bynta, la pynbna ba yn sa aiti noh ïa ka Final Report halor katei ka case. La pynkynmaw ruh ba ka jingai khubor lamler/FIR sha ki Pulit ka long ka kam pyrshah ïa ka aiñ bad lah ruh ban shim ïa ki jingpynshitom katkum ka kyndon aiñ.
