Agartala, Kyllalyngkot:
U Myntri Rangbah ka jylla Tripura u Manik Saha u la pyntikna ba ki lad ban ai jingshngaiñ ïa ka jylla ka long ban pynbiang ïa ki lad jingïada kiba la buh ban pyntreikam kyrpang.
Kumba la thmu hashwa, ka sorkar ka la dep ban pynthymmai ïa ki tiar bad ki rukom pyntreikam jong ki pulit ka Tripura ha kylleng ki jaka.
U la pyntip ba ka sorkar jylla ka thmu ban wanrah ïa ki kor ki bor kiba kham thymmai kum ki kamra pynïaid ba pyndonkam da ka AI, ki Drone, ki smart CCTV, bad ki System ba la pynbha ha ka kyrdan jong ki distrik bad ki jylla.
U Saha u la ong ba ki bor pulit ki don ka bynta kaba kongsan bha ban pynthikna ïa ka jingshngaiñ jong ki paidbah bad ban pyntreikam ïa ka aiñ.
“Ki pulit ka Tripura ki dei ka jingsarong jong ngi. Ha u snem ba la lah, ngi la rakhe ïa ka jingdap 150 snem jong kane ka bor shipai ba pawnam, kawei na ki bor ba la rim tam ha India. Naduh ka jingïada ïa ki jingim haduh ka jingïada ïa ki mar ki mata, ki pulit ki dei ka laiñ ba nyngkong eh ban ïarap ïa ki nongshong shnong kiba don ha ka jingeh. Ka long kaba donkam eh ba ngin trei da ka jinglong hok ban pynneh ïa ka jingngeit jong ki paidbah”, u la ong.
Naduh ba la ithuh ba ka jingshngaiñ ha ka jylla ka la shah ktah, ka sorkar ha ryngkat ka jingïatreilang bad ki pulit, ka la ïaleh katba lah ban ai ka jingshakri kaba kyrpang khamtam ha ka ban leit khynra bad pynjur ka jingleit thwet lehnoh sha kylleng ki jaka.
Ka jingdon jong ki jingleit ïaid pahara ka la kham pynduna ïa ki kam pyntriem kiba pyntieng pynsyier ïa ki paidbah.
Haba pynpaw ïa ki jingjop jong ka jylla ha kaba pynneh pynsah ïa ka shongsuk shongsaiñ, u Saha u la ïasam ba ki kam runar ha Tripura ki la hiar da 19.3% ha u snem 2024 haba ïanujor bad ki snem ba la leit, kaba long ka kam runar kaba duna tam ha ki shisnem.
U la ai burom ïa ki pulit kiba la lah ban pynthikna ïa ka ilekshon Lok Sabha bad Panchayat kaba suk bad ïaid beit ha kane ka snem.
U Myntri Rangbah u la ïaroh ruh ïa ki pulit bad ki shipai Tripura State Rifles (TSR) kiba la pynlong ïa palat 25 hajar tylli ki kam pynbha ïa ka imlang-sahlang ha ki lai snem ba la leit, kiba la ai jingmyntoi ïa palat san lak ngut ki nongshong shnong.
U la pynbna ruh ban pynkiew ïa ki jingsiew na ka bynta ki jingbam rashon, ki Uniform, bad ki jingsiew Dearness Allowance (DA) kum shi bynta jong ka jingpyrshang jong ka sorkar kaba dang ïaid shakhmat ban pynbha ïa ka jinglong jingman jong ki pulit. Haba batai ïa ki jingthmu ban pynthymmai, u Saha u la ong, “Ngi pynrung ïa ki kamra pynïaid ba la pynshong nongrim ha ka AI, ka Drone teknoloji, bad ki CCTV kiba khlaiñ bor ha baroh ar ki kyrdan jong ki distrik bad ki jylla.”
“Ka jaka treikam bathymmai jong ki pulit ka dang don hapdeng ka jingpyntreikam ban shna, bad ki jingpyntreikam ki dang ïaid shakhmat ban pynthymmai ïa ki jaka treikam jong ki pulit jong ka East bad West Agartala.
U Myntri Rangbahduh ka ri u Narendra Modi u la banjur ruh ïa ka jingdonkam ban shna thymmai ïa ki jaka treikam jong ki pulit kiba la rim bad ki jaka sah briew, bad ngi kut jingmut ban pynurlong ïa kane ka jingthmu”, u la ong shuh shuh.
