Jowai, Nailur 25
Ka SCSC Nonglatem bad Riatsaliya Mihmyntdu ki long ki kynhun ban ïaknieh ïa ka nam lahduh ha ka 3rd Division Football Tournament na ka bynta ka 5th Adelbert Laloo Memorial Trophy ba la pynïaid da ka West Jaiñtia District Sports Association (WJDSA), hadien ba ki la khur jingjop ha ka sngi Palei ha Kiang Nangbah Stadium, Jowai.
Ha ka jingïakhun semi-final kaba nyngkong, ka SCSC Nonglatem ka la pynliem noh ïa ka Lumkhangdong Kyndongtuber da 2-0 kol. Ïa kine la thep da u Obedient Pyrtuh ha ka minit kaba 57 bad u Tomy Lamare ha ka minit ba 66.
Haba phai sah kawei pat ka jingïakhun semi final kaba ar, ka Riatsaliya Mihmyntdu ka la jop da 4-1 kol ïa ka Pasyih Cultural SC. U Meban Kharsatti u la thep ar kol ha ka minit kaba 73 & 77, katba ïa kiwei pat la thep da u Become Pale (66) bad u Neviki Phawa (72). Na ka liang ka Pasyih Cultural ka la thep kol nyngkong lyngba u Budhokmiki Rymbai (29).
