Shillong, Nailur 25
Sa tang shi sngi ban sdang ïa ka 4th Sohra International Half Marathon 2025 ha kaba la khmih lynti ïa ka jingtuid ki nongshim bynta na kylleng ka Jylla, kumjuh napoh ri India bad wat nabar ri ruh kumjuh.
Kane ka jingïakop mareh kan long ha ka step jong ka sngi Saitjaiñ ha kaba yn sdang shwa da ka 5k ha ka por 5.30 mynstep, ha kaba yn bud sa ka 10k ha ka por 6 baje bad ka 21k ha ka por 6.30 mynstep, kat kum ka jingpyllait khubor da u General Secretary ka Meghalaya State Olympic Association (MSOA) u Bah Finely Lad Pariat ha ka sngi Palei.
U Myntri ka tnat ïalehkai ka Sorkar Jylla u Bah Wailadmiki Shylla lem bad ka khlur ïakura barim jong ka ri, ka Mary Kom kin long ki kongsan ban kaweh lama ha ka ïakop mareh jong ka 10k. Katba u Chief Secretary ka Jylla u Bah D.P Wahlang (IAS) bad u MLA ka thaiñ u Bah Gavin Mylliemngap bad u Bah Balajied Synrem, MLA ka Shella kin long ki kongsan ha ka jingsam khusnam sha ki nongjop.
