Khliehriat, Nailur 26
Ka FKJGP-KC hapoh ka jingïalam u Secretary, Bah Justme Sana ryngkat ka MPUF-EJ ba la ïalam da u President, Bah Kyrshan Blah ki la leit ïakynduh ïa u Superintendent of Police ka East Jaiñtia Hills ban pynkynmaw biang halor ka dorkhas ba ka seng ka la buh ha ka 21/05/2025 halor ka jingdon jong ki nongkhaïi masi bad nongkhaïi shini be-aiñ sha Bangladesh.
Kine ki ar seng ki la ong ba ki sngew phylla ban tip ba wat hadien ba la dep ujor sha u SP hynrei kitei ki kam khaïi-tuh masi ki dang ïai bteng kat haduh mynta-mynne.
Ki la ong ruh kaba sngew phylla ka long ba kitei ki kam be-aiñ ki ïaid lyngba ki ‘Check-Point’ jong ki pulit Ladrymbai, hynrei ym don ba tehlakam ïa kine ki kam be-aiñ bad kaba pynsuba jur ïa ki nongujor ba ka lah ban don kaei-kaei sha lyndet.
Lyngba u kyrwoh ki ar seng, ki la ong ruh ba ka jingkhaïi-tuh ïa ki masi shapoh Bangladesh lyngba ka thaiñ Ladrymbai shaduh Bangladesh ym tang ba kitei ki nongshalan ki pynrung tuh ïa ki masi shapoh Bangladesh, hynrei ki dei ruh kum ki nongïalam bad pyni lynti ïa ki nong Bangladesh kumno ban ïoh rung tuh shapoh u pud u sam jong ka Ri India.
Ki la ong ruh ba ka jingbym shimkhia da ki bor ba dei peit ka lah ban buh ka jingma kaba khraw ïa ka Jylla khamtam ha ka thaiñ East Jaiñtia ha kaba la ïohi ïa ka jingroi jong ki Muslim khamtam ha ki thaiñ Ladrymbai, Khliehriat.
