Shillong, Nailur 26
Ka Sorkar Jylla ka la rai ban thung da u Nodal Officer ban khmih halor ka jingpyntreikam ïa ka Soskular ïasuk bad ki kynhun ba la pynduh pyndam ka Achik National Volunteer Council (ANVC) bad ANVC-B ba la ïasoi ha ka 24 tarik Nailur 2014.
Ïa kane ka rai la pyntip da u Bah Prestone Tynsong Symbud Myntri Rangbah ba khmih ïa ka tnat kam pohïing (Police) hadien ka jingshong jingïalang bad ka ANVC bad ANVC-B ha ka jingdonlang u Chief Secretary, ka Director General Of Police (DGP) bad ki heh ophisar na ki tnad treikam ka Sorkar Jylla.
U Bah Prestone haba kren sha ki nongthoh khubor u la ïathuh ba ha ka jingïalang bad ki dkhot ka ANVC bad ANVC-B la ïathir sani bha halor ka ‘Text Settlement’ ba ïasoi hapdeng ka Sorkar Jylla bad Sorkar Pdeng ha u snem 2014.
U la ïathuh ba bun kiei-kiei ki ba la ïasoi ha ka ‘Text Settlement 2014’ ka Sorkar Jylla ka la lah pynurlong hynrei don pat katto-katne kiba ym pat lah ban shim rai, katba ka Rajya Sabha bad ka Lok Sabha kim pat ai ka jingmynjur ïa ka 125 Amendment jong ka Constitution ka Ri India.
U Bah Prestone u la ong “Ki dkhot ka ANVC ki la kyntu ïa ka Sorkar ban thung uwei u Nodal Officer namar ka long kaba eh ban wan kiew Shillong man ka por ban ïakren halor ka Soskular 2014 bad ka Sorkar ruh ka la mynjur da ka ba thung uwei u Nodal Officer u ban khmih ïa ki jingthmu ban pynurlong ki jingkular da kaba ïatreilang bad ka ANVC, ANVC-B, ka Sorkar Jylla, ka GHADC”
Haba jubab ïa ki jingkylli halor ka jingïoh jingmyntoi ki dkhot ka ANVC, ANVC-B na ka Soskular, u Symbud Myntri Rangbah u la ïathuh ba uwei u dkhot u ïoh mar T.1,50,000 bad mar T.3500 na ka bynta 6 bnai bad ka Sorkar ka la dep ban pyllait ïa ka song pisa.
Nalor kane u Bah Prestone ula ong ba ka Sorkar ka la pynthikna ba ïa ka jingïalang yn sa pynlong noh man la ka por, ban khmih bniah ïa ka jingiaid shakhmat ki kam ki jam bad ban shimkhia ïa ki mat kiba dang sah.
