Shillong, Nailur 26
Ha kine ki khyndiat sngi ba ladep, na ka liang ka Sorkar Pdeng ka la pynhiar ïa ka khajna jong ki mar ki mata, kata ka Goods and Service Tax kaba la treikam naduh ka 21 tarik u Nailur 2025, ha kaba bun ki mar ki mata, ba kynthup naduh ki kali, ki arshaka, ki TV bad kiwei-kiwei de ki la hiar dor lut.
Na ka liang u Nongthoh khubor u Nongsaiñ Hima hynnin ka sngi, u la leit ban ïakynduh markhmat bad ki nongpeit ïa ki jaka die kali bapher-bapher ha ki thaiñ Mawïong, ban tip kham bniah halor ki dor jong ki kali, bad la lap ba ki kali ki la hiar dor lut baroh.
Haba pyrshang pat ban ïakren bad ki Mahajon kiba die marbam ha Ïewduh, la ki marbam ki la hiar dor ne-em hadien ka jingpynhiar ka Sorkar ïa ka GST, ki la ïathuh ba u khaw um hiar dor mynta, namar ba mynshwa ka GST ka long 5% bad mynta ruh ka neh hi 5%. Da kaba ïathuh ruh ba mynshwa ki don ki khaw bym donkam GST, kumta ka dor ka neh hi kumba ka long.
Haba kylli, ki Mahajon ha Ïewduh ki la ïathuh ba kam don ka jingpynhiar ka GST ïa ki marbam, kum ki umphniang, ki dai, shini bad u khaw bad ki dor ki neh hi kumjuh.
“Ki mar kiba la pynhiar ïa ka GST, kum ki katto katne ki jait sabon ki don ba la pynhiar ïa ka GST bad ki don ruh bym pynhiar, nangta de ki jingpruid ba mynshwa ka GST kadei 12% mynta pat la hiar sha ka 5%,” la ong ki Mahajon.
Shuh-shuh ki la ïathuh ruh ba ki don kiwei-kiwei ki marbam kiba don ïa ka GST, ki la hiar ka dor hynrei la ong, ba ka dor ka kham hiar bha sha ki tiar ilektronik bad tang katto-katne pat ha ki marbam.
