Shillong, Nailur 26
Ka jingïakhih jong ki nonghikai Adhoc kiba hap hapoh ka shatri jong ka Federation of All School Teachers Of Meghalaya (FASTOM), ka la ïaid mynta la san sngi lynter, da kaba shong kyllaiñ mungor ha madan Malki, ban dawa na ka Sorkar Jylla ban kyntiew kyrdan noh ïa ki skul Adhoc sha ka deficit system/deficit pattern.
Haba buddien ïa kane ka khubor, la ïoh ban ïakren bad u Bah S.Jungai, Vice President ka kynhun, u la ong ba dang shen ha ka jingïa-kynduh bad u Myntri ka tnad pule puthi ka Sorkar Jylla, u Bah Lahkmen Rymbui um shym la ai kano-kano ka jingkular sha ki nonghikai.
“Ngeit skhem ba lada u Myntri Rangbah ka Jylla u Conrad K Sangma un shim ïa ka jingkitkhlieh ban kyntiew kyrdan noh ïa ki nonghikai Adhoc sha ka deficit system/deficit pattern ryngkat bad ka jingthoh ngi kloi ban weng ïa ka jingïakhih,” u la ong.
U la ong ba lada na ka liang ka Sorkar kam don eiei ban jubab sha ki nonghikai halor kine ki jingdawa, kin bteng beit shwa ïa kane ka jingïakhih kaba khlem buh por.
U Bah Jungai u ong ba ka Sorkar ka dei ban sngewthuh ïa ka jingeh jong ki nonghikai. “Kumba baroh ki la tip ba ha u snem 2022, ka tulop jong ngi ka la kiew bad ha kito ki por ngi dang mut ba ka la biang eh hynrei namar ka jingkiew dor lut ki mar ki mata ha kine ki snem, ka la pynbor ïa ngi ban shim ïa kane ka sienjam ban ïakhih bad ban dawa na ka Sorkar, khnang ban ngin ïoh ïa ka tulop kaba biang” la bynrap u Bah S.Jungai.
Haba kylli halor ka jingktah ïa ki khynnah skul haba ki nonghikai ki wan shong ïakhih, u Bah Jungai u la ong “ka don hi ka jingktah ïa ki khynnah skul, hynrei ngin nym khang pat ïa ki skul, ngi la ïa kylliang ïa ki sngi ban leit sha skul bad ban wan ïakhih, khnang ba ki khynnah skul kin nym duh ïa ka jinghikai.”
Nalor kata, u la ong “Ngi la rai beit ba lada ka Sorkar ka khot ban ïakren, kum ki nongïalam ngin leit beit hynrei ngi ïeng beit ha ka nongrim, ba kaei kaba mih na ka jingïakren ngin rah beit sha ki nonghikai ba bun ha jaka ïakhih bad ka rai baroh ka shong ha ki nonghikai”.
Kumta u Bah Jungai u la kyntu ïa ka Sorkar ba kan ai noh ïa ki jingdawa jong ki nonghikai, khnang ba kan long ka jingïarap na ka bynta jong ki bad ruh ïa ki khun ki kti.
