Shillong, Nailur 26
Ka Jylla ka ïoh pdiang haduh 19,000 tylli ki jingjia shah dait ksew man la u snem, ha kaba ka East Khasi Hills ka don palat 5,000 tylli ki jingjia bad 15 ngut ki la ïap mynta u snem.
Kaba sngew shyrkhei ka long ba kiba bun na kiba ïap ki dei namar ka jingbym shimkhia haba ïadei bad ki jingshah dait ne jingshah trud.
Ïa kane la pynpaw ha ka jingïalang rakhe ïa ka ‘World Rabies Day’ kaba la pynlong da ka District Joint Steering Committee for Rabies Elimination, East Khasi Hills, ha ryngkat ka jingïatreilang bad ka tnad ka Koit ka Khiah bad Veterinary, Shillong Municipal Board, ki seng treimon sngewbha, bad ki nongïalam ka imlang-sahlang ha Lumparing Sports Club Indoor Hall ha ka Sngi Thohdieng.
Ïa kane ka jingïalang la pynlong hapoh ka phang “Act now: You, me and the community”, da kaba ban jur halor ka jingdonkam jong ka jingïatreilang ha ka ban ïada na ka jingpang ‘Rabies’.
Haba ai jingkren ha ka jingïalang kum u Kongsan, u Myntri ka tnad Animal Husbandry & Veterinary, Bah Sanbor Shullai u la kyntu ïa ki nongshong shnong ban ai tika ïa ki mrad ba ki ri, ban shimkhia kloi ïa ki jingmong na ka jingshah dait ksew, bad ban kyrshan ïa ka jingpynïaid ha ka ban tehlakam ïa ki ksew surok, da kaba kdew ba ka jingpang ‘Rabies’ ka long kaba lah ban ïada 100% hynrei ka lah ban ïalam pat sha ka jingïarap lada ym sumar bha ïa ka.
U P.K. Sangma, Additional Deputy Commissioner, East Khasi Hills, u la pynpaw ïa ka jingdonkam kaba kyrkieh halor ka jingshimkhia na ka liang ka imlang-sahlang ban ïada na ka jingpang ‘Rabies’, katba ka Dr. R. R. Marak, District Nodal Officer, NRCP, ka la ïasam ïa ki jingkheiñ kiba sngew shyrkhei halor ki jingjia shah dait ksew bad ki jingïap briew ha ka Jylla.
Ka la ong ba ka Jylla ka ïoh pdiang palat 19,000 tylli ki jingjia shah dait ksew ha ka shisnem, ha kaba palat 5,000 ngut ki dei na East Khasi Hills, bad ki 15 ngut ki la ïap mynta u snem. Kham bunsien ki jingïap ki jia namarba bunsien la shim sting ïa ki jingshah dait ne jingshah trud.
Ha kane ka prokram la don ruh ki jingkren pynsngewthuh bad ki jingïamir-jingmut na ki ‘riew shemphang, kiba kynthup ïa Dr. N. Marbaniang, District Veterinary Officer, Dr. Lambert Syiemlieh, Dr. Freddy Nongdhar, Bernadeth Sohtun HUFAN, Andrew Umdor (SMB), bad Dr. Iada Lyngdoh, State Nodal Officer NRCP.
Shuh-shuh ka la don ruh ka jingshim smai kaba la ïalam da u Kongsan, u Bah Sanbor Shullai, ban kyntiew ïa ka jingïatreilang ha ka ban ïakhun pyrshah ïa ka jingpang ‘Rabies’.
Nalor kane, la pynlong ïa ka ‘Poster Competition’ na ka bynta ki khynnah skul ban pynsngewthuh shaphang ki lad jingïada na ka jingpang ‘Rabies’.
La pynlong ruh ïa ka prokram ban kem bad ai injek ïa ki ksew surok, da ka jingthmu ban ïada na ka jingsaphriang jong ka jingpang ‘Rabies’ ha ka imlang-sahlang.
