Tehran, Nailur:
Katkum ki khubor, la ong ba ka Iran ka la pyrshang pynher ia u ‘namding u bym don jingtip khlem kano- kano ka jingpynbna bad ka la pynher ia utei u ‘namding na ka tnat ‘namding jongka- ka Imam Khomeini Spaceport, ki dur satellite ba la bishar bniah da ki lad pathai khubor, ki la pyni ha ka Sngi Palei, kaba pynpaw ïa ka jingpyrshang jong ka Iran ban pynneh pynsah ïa ka prokram tiar thma jongka wat hapdeng ka thma kaba 12 sngi bad ka Israel ha u bnai Jylliew ba la leit.
Ka Iran kam shym la kam satia ïa ka jingpyrshang ha ka taiew ba la dep ha ka jaka ba kyllum kaba la pynlong ïa kiwei pat ki jingpynher ba kongsan da ka prokram pynher riew paidbah jong ka ri. Hynrei uwei u nongthaw ain ha ka iing dorbar jong ka Iran, u la kam, khlem da ai ia ki sakhi, ba ka Tehran, ka la pyrshang ia u nam siat, uba lah ban ialeh pyrshah ia ki dewbah.
Kane ka jingpyrshang bad ka jingkynnoh ka pynmih ïa ka jingsngewkhia ba ka Iran ka lah ban pyrshang ban pynïar ïa ka jingpynmih namding namar ba ka jingeh ka dang jur bha ha shwa ki jingpynjari jong ka United Nations, kiba lah ban pynjari biang mynta ka taiew ba kut halor ka prokram nuclear jong ka Iran haba iadei ruh bad ka jing maramot jongka ïa ki jaka ‘namding kiba la shah siat ha ki Israel.
Ha ka 18 tarik u Nailur, ki nongpyndonkam social media jong ka Iran, ki la pynmih ïa ki dur jong ka bneng halor ka Jylla Semnan, kaba pyni ïa kaei kaba la paw kum ka jingbeh jong u rocket ha ka por ba sep ka sngi. Ki heh sorkar Iran kim shym la kam ia kaei kaba la pynlong ia katei ka jingiakynad, bad ki lad pathai khubor jong ka sorkar Iran kim shym la pynpaw ia katei ka jingjia.
