Shillong, Nailur 26
Ka Sawmer ka la kiew sha ka kyrdan kaba 4 ha ka thup ïalehkai jong ka Shillong Premier League 2025 kaba la long ha madan ‘SSA Stadium First Ground’, ha Polo da kaba pynliem ïa ka Mylliem da 3-0 kol. U Michaelson Kurbah u la thep ar kol ha ka minit kaba 38 bad 54, katba u Khainkupar Iawphniaw u la pynskhem ïa ka jingjop da ka bol kaba la shut na rud ka ‘box’ ha ka minit kaba 77. Kane ka jingjop ka dei ka jingjop kaba arsien lynter jong ka Sawmer bad ka jingjop kaba arsien khlem da shah thep kol kylliang jong ka ha kane ka samoi ïalehkai.
Ka Sawmer ka don mynta ha ka kyrdan ba 4 ryngkat ki 9 poiñ. Katba ka Mylliem ka dang sah ha ka kyrdan ba shapoh kata ha kaba 9 ryngkat tang 5 poiñ .
Ka jingïakhun ban wan ha ka SPL kan long ha ka Lah sngi U Blei, ka Malki kan ïakhun pyrshah ïa ka Nangkiew Irat ha ka por 4:30 janmiet.
