Mawkyrwat, Nailur 26
Kawei ka kali Alto 800 kaba don ïa u registration ML05 – M – 3148 kaba dei ka kali jong u Acting Syiem ka Hima Nobosohphoh u Bah Ferdinand Syiemiong ha ka miet jong ka 25 tarik u Nailur 2025 ka la kylla dpei bad ingkhong baroh hadien ba ki runar ki bym lah ban tip ki la thang dusmon katba u dang pynïeng ha rud surok ha ka shnong Rangblang, South West Khasi Hills District.
U Bah Ferdinand Syiemiong Acting Syiem haba kren sha ki lad pathai khubor, u la ïathuh ba kane kam dei ka sien ba nyngkong ba ka kali jong u ka la shah leh dusmon ha ki runar ki bym lah ban ithuh bad u la ïathuh ba kane ka dei ka sien ba ar ha kaba ha kaba myn nyngkong ki runar ki la pynpait ïa ki ïit kali bad ha kane ka kynti ba mynta ki la thang syndon ïa ka kali haduh ban da ingkhong baroh.
U Bah Ferdinand Syiemiong u la pynpaw ka jingsngewsih halor kane ka jingjia da kaba kyntu ïa ki briew kiba leh ïa kane ka kam ba ki dei ban mih shakhmat ban kren shai ba ki don daw aiu haduh ba kin da thang dusmon ïa ka kali jong u.
Ha kaba ïadei bad kane ka jingjia, u Bah Ferdinand Syiemïong ha ka step kaba bud ka 26 tarik u Nailur 2025 u la ujor da ka ejahar ha Mawkyrwat Police Station bad kyrpad ïa ki bor jong ka aiñ ba kin thwet bad pynshitom ïa kiba donkti ha kane ka kam.
