Washington, Nailur:
Uwei u heh jong ka tnat kam bar ri jong ka US, u la ong ba ka Kashmir ka dei ka mat kaba beit hapdeng ka India bad ka Pakistan bad ka US kam don jingmut ei ei ban leit tuklar halor katei ka bynta kaba kine ki ar tylli ki ri ki ju iakynad bad iaknieh ia katei ka bynta.
Ha ka jingïakren bad ki nongthoh khubor, une u heh sorkar u la pynskhem ba, ka US kan bteng ïa ka “policy ba la slem bha ba kane ka dei ka mat kaba beit hapdeng ka India bad ka Pakistan”. U la bynrap ruh ba u president jong ka America, u Donald Trump, u don “ki jingeh kiba biang ha ki kti jongu” hynrei un long uba kloi ban ïarap lada pan ïa u.
“Ngin ieh ia kata ha ka India bad ka Pakistan ban pynbeit”, la bynrap biang une u heh sorkar.
U la pynpaw ba ka US kan pynleit jingmut ha ka America First policy haba ïadei bad ka India bad ka Pakistan. “Ngi dang iai bteng ban iohi ia ka India bad Pakistan ha ki ar jait ki rukom ba kyrpang, ban iohi ia ki ha la ka jong ka jong ka jingiadei, ban peit ia ka polisi America First kaba kyntiew ia ka jingmyntoi jong ngi,” la ong u heh sorkar.
Hynrei, haba pynkynmaw biang ïa ki jingkynnoh jong u Trump ba u la pynsangeh ïa ka jingïakynad hapdeng ka India bad ka Pakistan, ha ka por ba u kren ha ka jingïalang bah jong ka United Nations, u heh jong ka tnad kam pohïing u la ong, “ka dei ka jingshisha ba ka America ka la donkti ha kata ka jingeh bad ka la ïarap shisha ban pynbeit ïa kata ka jingsangeh thma.”
Ka India, ka pynskhem ba kam kwah ia kano kano ka liang kaba lai, ha ka jingiakren jong ka bad ka Pakistan, halor ki mat kum ki kam lehnoh, namar ba ka New Delhi, ka ngeit, ba ki dei ban dang long arliang mamla.
Ka India ka la sdang ia ka Operation Sindoor dei ha ka 7 tarik jong u bnai Jymmang, kum ka jingpynhiar kput ia ka jingwan thombor jong ki lehnoh Pakistan hapoh Pahalgam ha ka 22 tarik jong u Iaiong, ha kaba 26 ngut ki nong India ki la duh ei ia ka jingim ha katei ka jingwan thombor jong ki lehnoh ka Pakistan. Kumta, la ong ba ki shipai ka India, ha katei ka Operation Sindoor, ki la leit ban pynjulor bad leit ther bom ia ki ktem lehnoh ha ki bynta jong ka Jammu & Kashmir kiba hap hapoh ka jingkhmih jong ka Pakistan, ha kaba palat 100 ngut ki lehnoh Pakistan ki la kyllon iap ha katei ka jingleit hiar thma jong ka India.
Naduh ka 10 tarik u Jymmang, U Trump u la ju kam trai la bunsien ba u la “iarap ban pyniasuk ia katei ka thma”, ka jingiakynad hapdeng ka India bad ka Pakistan da kaba ong ia ki ar tylli ki ri ba marjan ba ka America kan nym treh shuh ban iatreilang bad ka Pakistan lane ka India, lada kim sangeh iasiat noh shi syndon.
Ka India, ka la kyntait ïa kitei ki jing-kam trai jong u Trump ba dei ka US kaba pyniasuk ia katei ka thma hapdeng ka India bad Pakistan, da kaba pynskhem ba katei ka jingsangeh thma, ka dei lyngba ka jingïakren hapdeng ki shipai jong ka India bad ka Pakistan ym da ka jingpynïasuk jong ka US.
