Shillong, Nailur 26
Ka tnad District Council Affair ka la pdiang ïa ka jinghiar shuki u Bah Shemborlang Rynjah kum u Chief Excecutive Member (CEM) ka Khasi Hills Autonomous District Council (KHADC) bad ka la pynbna ba un dang long u ‘Caretaker CEM’ tad haduh ban da ïoh ïa u CEM ba thymmai.
U Symbud Myntri Rangbah ka Jylla u Bah Prestone Tynsong u ba khmih ïa ka tnad DCA, haba kren sha ki nongthoh khubor ha ka 26 tarik Nailur 2025 u la ong ba ka tnad DCA ka la pdiang ïa ka jinghiar shuki noh u Bah Shemborlang Rynjah bad ka tnad ka la phah ïa ka shithi sha u Lat ka Jylla ha kajuh ka por ka la ai jingmut ruh ba u Bah Shemborlang Rynjah un bteng ban long kum u ‘Caretaker’ CEM haduh ban da dep jied ïa u CEM ba thymmai.
Haba kylli la ka NPP kan buh kyrtong ban ïakhun ïa ka ilekshon CEM, u Bah Prestone u la ong ba, ïa ka rai ban buh kyrtong ha ka ilekshon CEM, ka shong ha ka rai jong ki dkhot ka liang pyrshah kiba don hapoh ïingdorbar ka Council.
Kum ban shu kdew hangne u Bah Shemborlang Rynjah u dei u MDC ka 9-Langkyrdem-Laitkroh Constituency, uba long ruh kum u Chief Excecutive Member (CEM) ka Khasi Hills Autonomous District Council (KHADC). U Bah Shemborlang u la aiti ïa ka shithi hiar shuki jong u ha u Shongknor (Chairman) ka Council myn ha ka 24 tarik Nailur 2025 da kaba kdew ba u don hapdeng ka jingbym shait bha ka met.
Ka Voice of the People Party ka ba don ka jingbun paid ki ha Khasi Hills Autonomous District Council, shisngi hadien ba la hiar shuki noh u CEM, ha ka 25 tarik Nailur 2025 ka la lum jingïalang bad ka la jied ïa u Bah Winston Tony Lyngdoh u MDC na Nongthymmai Constituency ba un long u kyrtong ban ïakhun ïa ka shuki CEM.
Katkum ka jingpyntip na u Lat ka Jylla ka ilekshon CEM kan long ha ka 30 tarik u Nailur 2025 ha ka por 11 baje mynstep ha ïingdorbar ka Council.
