Shillong, Nailur 26
U Myntri Rangbah duh ka Ri u Narendra Modi, un sa pyllait paidbah ïa ki 92,633 tylli ki 4G site thymmai jong ka Bharat Sanchar Nigam Limited (BSNL) kynthup ha Meghalaya 238 tylli ki tower 4G.
Ïa kane la pyntip ha ka jingïalang ka ba la long ha ka 26 tarik Nailur 2025 ha BSNL ophis IGP Shillong ha ka jingdonlang ka Kong Daily Giri kaba long kum ka CGMT NE, u Bah HL Nongkhlaw ki heh ophisar na ka ophis BSNL Shillong bad kiwei-kiwei.
La ong ba ha ka 27 tarik u Nailur 2025 kan don ka jingïalang ha Jharsuguda, Odisha ba u Myntri Rangbah Duh ka Ri India un pynbna paidbah ïa ka thong jong ka Aatmanirbhar Bharat ha ka kam ‘telecom’ bad un sa plie paidbah ïa 92,633 tylli ki 4G tower thymmai, kiba kynthup ruh 14,000 tylli ki ‘Saturation Project’ ka teknoloji ban pynlong ïa ka Ri kum kawei na ki 5 tylli ki Ri kiba don ïa la ka jong ka ‘telecom’ bad kane ka long ka nongrim ruh ban bteng sha ka 5G ha ki sngi ban wan.
Ha ki thaiñ shatei lam-mihngi, ka Swadeshi 4G network ka la don ha ki 12 distrik ha ka Jylla Meghalaya, 9 distrik ha Jylla Mizoram bad 8 distrik ha ka Jylla Tripura, ha kine ki jaka la ong ba la tei haduh 1,278 tylli ki tower bad ka jinglut jingsep ka kot haduh T.1092 klur.
Ka thong jong ka DBN 4G hapoh ka Project USOF, ka long ban pynpoi sha ki shnong kiba khlem pat don network 4G ka BSNL ban wanrah ïa ka ‘Digital India Project’ sha ki shnong ki ba kham kyndong, ba kan long ka jingïarap ha ka pule puthi, ka koit ka khiah, ka ïohkam ïohjam, ka rep ka riang bad ban pynïasoh ïa ki nongshong shnong sha ka pyrthei thymmai jong ka ‘science’ bad ka teknoloji.
Shuh-shuh la ong, ban pynbiang network ha ki jaka khappud jong ka ri, khnang ba ka jingtip sha ki nongshong shnong ka long kham ryntih, ka jingpynpoi ïa ka BSNL ha ka kylleng ka thaiñ lam mihngi (NE-I) ha kaba ka 4G Saturation Project, ka thmu ban tei 406 tylli ki tower kata ha Meghalaya-238, ha Mizoram-53 bad ha Tripura-115 bad haduh mynta la pyndep 246 tylli ki tower, ha Meghalaya-136,ha Mizoram-1 bad ha Tripura-93 tylli.
Ka BSNL kan pynkylla noh shen ïa ki 2G/3G ba don lypa sha ka 4G/5G ba thymmai, khnang ba ki nongshong shnong ha baroh ki bynta jong ka Jylla kin ioh ïa ka network ba kham biang, ba kham khlaiñ na la ka jong ka Ri.
