Shillong, Nailur 28
Ka phlim Khasi kaba la ai kyrteng ‘Draibar Taxi’ yn sa pyni noh shen ha Bijou Cinema, Shillong, kata ha ka 10 tarik u Risaw (October) 2025.
Ia ka trailer jong kane ka phlim, la dep ban pyllait paidbah ha ka janmiet jong ka sngi Saitjaiñ, ka 27 tarik u Nailur 2025, da u Bah Wandonbok Jyrwa uba dei u President jong ka East Khasi Hills Local Taxi Welfare Association, ha Shillong Club, Shillong.
Ha kane ka sngi pyllait paidbah ïa katei ka trailer la ïadon lang u President ka Synjuk Taxi Sor bad Khapsor Association, u Bah Kmenlang Khonglah, ha ryngkat ki ki nongïa shim bynta ha kane ka phlim, ki nongshah khot sngewbha bad kiwei kiwei de.
Haba kren ha kane ka sngi na ka liang u Bah Wandonbok Jyrwa bad u Bah Kmenlang Khonglah ki la ai ka jingkitbok kitrwiang ïa kane ka phlim, ba kan sa long ka phlim ka ban sa ïaid ïew bha, ban ïa nujor bad kiwei pat ki phlim kiba la dep pyni.
Kumta ki la kyrpad ruh ïa ki paidbah jong ka Jylla hi baroh kawei, ba kin wan ban ai jingkyrshan lem ïa kane ka phlim ynda la pyni ha Bijou Cinema, Shillong, namar kane ka phlim ka don ïa ka khana kaba sngewtynnad bha, ba ki draibar ki don kiba bha bad ki don ruh kiba sniew.
“Ki draibar ki ïakynduh ruh ïa ki passenger bapher bapher man la ka sngi haba ki kamai bad kumta ter ter,” ki la ong.
Kumta ïa kane ka phlim yn sa pyni paidbah noh ha ka 10 tarik u Risaw (October) 2025, ha Bijou Cinema, Shillong bad ka por ban pyni kan long ha ka por 11:30 mynstep, 2:30 noh phai sngi, 5:30 janmiet bad 7:00 baje janmiet.
Lah ban kdew ba ïa kane ka phlim la sdang ban ringdur nyngkong eh ha u snem 2019 bad na ka daw ka jingpynthud noh jong ka khlam Covid-19, ki la hap ban sangeh shwa shipor da kaba bteng pat ha ki snem kiba hadien.
