Mawkyrwat, Nailur 28
Hadien ka jingshah thang ka kali Alto 800 jong u Bah Pherdinan Syiem-iong, Acting Syiem ka Hima Nobosohphoh u ha ki runar ki bym lah ban ithuh ha ka step phyrngap jong ka 26 tarik Nailur, 2025, na ka liang ka Synjuk ki Rangbah Shnong (SRS) Nobosoh-phoh Syiemship ha ka 27 tarik Nailur, 2025 ki la lum ïa ka jingïalang ba kyrkieh ban ïa pyrkhat halor kane ka jingjia hapoh ka ophis treikam jong u Syiem ha Rangblang South West Khasi Hills District.
Hadien ka jingïalang, na ka liang ki nongïalam ka Synjuk ki Rangbah Shnong jong ka Hima Nobosohphoh ki la pynrem jur ïa ka jingleh riewkhlaw jong ki briew kiba la thang dusmon ïa ka kali jong u Acting Syiem kaba la wanrah ïa ka jingjah burom namar kum kine ki kam kim ju kham jia koit hapoh ka hima.
Ka Synjuk ka la kyntu jur ïa ki bor jong ka aiñ ba kin thwet mardor ïa kine ki briew kiba leh ïa kane ka kam bad ban kem ïa ki khnang ba kum kine ki jingjia kin nym jia shuh nangne shakhmat.
U Bah Pherdinan Syiemïong, Acting Syiem ka Hima Nobosohphoh haba kren sha ki lad pathai khubor u la pynpaw ïa ka jingsngewsih kaba khraw halor kane ka jingjia bad u la kyntu ruh ïa ki khun ki hajar ki bym hun ne sngewtynnad ïa ka jingtreikam jong u ba kin wan shakhmat ban ïakren lada don kano kano hynrei ym ban pynjot ne leh dusmon ïa ki mar ki mata.
U la ïathuh ruh ba u khlem phohsniew ne don ka jingthrang ban shong ha ka shuki ka hima kum u Syiem, hynrei namar ka jingshah sospon jong u Syiem uba rim, ka hima ka la bynshet ïa u ban shim ïa kane ka kam ha ryngkat ka jinghun lang ka kur Syiemiong.
U la ïathuh ba ha ki khyndai bnai ka jingtrei kam kum u Syiem, u la pyrshang katba lah la i bor ban pyntyllun ïa ki kam ka hima ha ryngkat ki dkhot bad ki Lyngdoh bad u la ïathuh ba kum u briew ba tlot bad u bym pat ju mad ïa ka kam synshar u sngew ban panmap na ki khun ki hajar namar um lah ban pynhun lut ïa baroh bad u sngew ban ong ba lada don eiei pyrshah ïa u, u sngew ban kyrpad ba kin wan ban ïakynduh markhmat ban ïakren markhmat bad lada kim hun ne ibit, u kloi ban hiar na ka khet.
Kiba ai jingkren ha kane ka sngi ki long u Bah Bokstone Thongni, Secretary Synjuk Rangbah Shnong, Bah R Ramsiej, dkhot Synjuk Rangbah Hima Nobosohphoh Syiemship bad kiwei kiwei.
