Shillong, Nailur 28
Ka tnad pule ki kam jngohkai pyrthei bad ‘Travel Management’ jong ka MLCU, ha ryngkat ka jingïatreilang bad ka Hima Sohra lem bad ka Meghalaya Rural Tourism Forum (MRTF), ka la pynlong ïa ka prokram kaba ar sngi ha Sohra ban rakhe ïa ka sngi kyrpang ki kam jngohkai pyrthei, 2025 halor ka phang pdeng “Tourism and Sustainable Transformation”.
Kane ka sienjam ka thmu ban pynpaw ïa ka bynta jong ka kam jngohkai pyrthei ha ka ban kyntiew ïa ka jingpynneh-pynsah bad ka jingpynroi ïa ka imlang-sahlang da kaba pynïadon bynta lang ïa ki samla pule, ki nongshim bynta ha ka thaiñ bad ki nongwan jngohkai pyrthei ha ki kam kiba kit jingmut.
Ïa kane ka prokram la sdang ha ka 26 tarik Nailur da ka ‘Clean, Green and Safe Sohra Campaign’ ha Mawkdok.
Palat 40 ngut ki samla pule ka MLCU, ryngkat bad ki nongshong shnong, ki la ïashim bynta ha ka jingpynkhuid ban kyntiew ïa ka kam jngohkai pyrthei kaba don ïa ka jingkitkhlieh. La buh ruh ïa ka ‘Facilitation Booth’ ban sam ïa ki pla bret jaboh sha ki nongñiah ‘Tourist’ taksi bad ki kot lyngkdop sha ki nongwan jngohkai, ban pynsngewthuh shaphang ka leit ka wan kaba lah ban pynneh-pynsah.
Ha ka por mynsngi, ka prokram kaba la pynlong mar pyrshah ka Café Cherrapunjee ka la sakhi ïa ka jingplie paidbah ïa ka ‘Clean, Green and Safe Sohra Campaign’ bad ka jingïasoi ïa ka MoU hapdeng ka tnad pule ki kam jngohkai pyrthei bad Travel Management jong ka MLCU bad ka Hima Sohra ban pynkhlaiñ ïa ka kam jngohkai pyrthei ha nongkyndong bad ban kyntiew ïa ka jingïashim bynta jong ka imlang-sahlang ka MLCU ha Sohra.
Ha ka 27 tarik u Nailur, ka jingrakhe ka la bteng da ka jingïashim bynta shitrhem ha ka ‘4th Sohra International Half Marathon’.
Ki samla pule na katei ka tnad pule ki la shim bynta mon sngewbha ha shilynter ka lynti mareh ‘Marathon’ ha ryngkat ka jingïatreilang bad ki skul shnong na Sohra kum ka Laitryngew Presbyterian School bad ka Mawmihthied Upper Primary School.
Ban pynphriang ïa ka khubor jong ka jingpynneh-pynsah, ïa ki ‘Flex Banner’ ba don ïa ki jingthoh ha ka ktien Phareng bad Khasi la pynieng da ki samla pule ha ki jaka ba kongsan kum ha Laitsohpliah, Umstew, Lad Mawkma, kaba pynskhem ïa ka phang jong ka kam jngohkai pyrthei kaba don ka jingkitkhlieh bad kaba shngaiñ.
Shuh shuh kane ka jingrakhe kaba ar sngi ka la pynpaw ïa ka bor jong ka jingïatreilang hapdeng ki ‘riewstad ka pule-puthi, ki bor synshar shnong, bad ki nongshim bynta ha ka imlang-sahlang ha ka ban pynïaid ïa ka kam jngohkai pyrthei kaba don ka jingkitkhlieh, kaba kynthup lang, bad kaba neh, kaba pyni kumno ka kam jngohkai pyrthei ka lah ban synñiang shisha sha ka jingkylla kaba neh jong ka Jylla.
