United Nations, Nailur:
U President ka Ukraine, u Volodymyr Zelensky, u iathuh ha ka UN Security Council ha ka Sngi Ba-ar, ba ka China ka lah ban pynbor ia ka Russia, ba kan pynkut noh ia ka thma ha ka ri jong u, hadien ba ka US, ka la kyntu jur ia ka China ba kan sangeh thied ia ka umphniang jong ka Russia.
Ka China, kam dei ka bynta jong katei ka jingialeh, hynrei ka Ukraine, ka la ujor la slem bah, ba ka China, ka la pynbiang ia ki tiar sha ka Russia, kiba lah ban pyndonkam ha ka thma jongka, pyrshah ia ka Ukraine, bad ka dang iai bteng ban thied ia ka bor ding jong ka Russia.
“Ka China ruh ka don ka nongmihkhmat hangne, ka jaitbynriew kaba donbor ha kaba ka Russia mynta ka shaniah pura”, la ong u Zelensky ha ka council, ha kaba ka China ka dei ka dkhot ba neh.
“Lada ka China ka kwah shisha ba kane ka thma kan sangeh, ka lah ban pynbor ia ka Russia ban pynkut noh ia ka jingwan hiar thma hangne, namar, khlem ka China, ka Russia jong u Putin kam long eiei.”
“Hynrei bunsien ka China ka shu sngap jar ha ka jaka ba kan ialeh shitom ban iarap ban wanrah ia ka shongsuk- shongsaiñ ha ka pyrthei,” la ong u Zelensky.
Ka Beijing ka kyntait jur ba ka pynbiang ia ka Russia ia ki tiar ban pyndonkam ha ka jingialeh shipai jong ka ha Ukraine, bad ka la pyrshang ban pyni ia lade kum ka nongpyniaid kaba khlem liang kaba kloi ban iarap ban pynbeit ia ka jingialeh.
“Naduh ka sngi ba nyngkong jong ka jingeh, ka China ka la bat ia ka nongrim kaba thikna, kaba khlem liang kaba khot ban sangeh noh ia ki jingialeh pyrshah bad kaba kyrshan ia ka jingiakren iasuk sha ka jingpynbeit ia ka sain pyrthei,” la ong u Geng Shuang, u nongmihkhmat ba kyrpang jong ka China ha ka UN.
Ha ka Sngi Ba-ar, U President jong ka America, U Donald Trump, ula khot ia ka China bad ka India, kum ki “primary funders” jong ka thma jong ka Russia ha Ukraine, katba ki dang iai bteng ban thied bad pyndonkam ia ki hydrocarbon jong ka Moscow.
“Ka China bad ka India ki dei ki nongbei tyngka ba kongsan eh jong ka thma kaba dang ïaid shakhmat da kaba bteng ban thied ïa ka umphniang jong ka Russia,” u la ong.
