Nongstoiñ, Nailur 28
Ka skul Edren Memorial Secondary School ha ka sngi Saitjaiñ jong ka taïew ba la lah ka la ïoh ban rakhe leh kmen kyrpang ïa ka sngi jong ka jingkynjoh sha u mawmer ba 30 snem, kata naduh ba la seng ïa ka naduh u snem 1995 da u Bah Edrenshon Lyng-khoi (bam kwai ha dwar U Blei).
Ha katei ka sngi u Bah Gabriel Wahlang, MLA ka Nongstoiñ u la wan ban long kum u kongsan ha ka jingdonlang ruh u Rev. JL Mawlong bad kiwei kiwei ki riew pawkhmat ka thaiñ bad ka Kong Goldstone Syiemlieh, Headmistress katei ka skul.
Shuh shuh ha katei ka sngi, u kongsan u la ïoh ban pyllait paidbah ruh ïa ka souvenir jong katei ka skul bad ha kajuh ka por kum ka dak jong ka jingrakhe lehkmen la ïoh ban ot ruh ïa u cake.
U Bah Gabriel Wahlang haba ai jingkren u la ong, u sngewthuh ba ka jingïaid lynti jong ka skul kat haduh ba kan kynjoh sha u mawmer ba 30 snem kam dei kaba suk hynrei kumba U Blei um shym la weng ïa ka duriaw basaw ha ka por u Moses bad pynban u la phiah bad kad arliang ïa ka kumta hi ha ka jingim u briew ruh un um weng ïa ki jingeh hynrei un plie pat da ki lad ki lynti ban poi sha ka thong, kam dei ban duh jingkyrmen.
U kongsan u la kyntu ruh ïa ki khynnah skul da kaba u la ong ba kam pher la ka skul ka rit ne ka heh hynrei haba uba pule u don ïa ka dohnud ban minot, yn ym don ba lah ban khang ïa ka jingangnud ban poi sha ka thong.
Shuh shuh ha katei ka sngi la pyniphuh iphieng ïa katei ka jingïalang da ki sur jingrwai bad ki jingshad bad kiwei kiwei ki jingpynbyrñgia bad la wan ban ïa sakhilang ruh da ki kmie ki kpa bad kiba la pass lyngba katei ka skul.
