Shillong, Nailur 28
Ka Synjuk Ki Rangbah Kur Ka Bri U Hynñiewtrep ba la seng ha ka 7 tarik Kyllalyngkot 2019 ba la lam khmat da u Bah H S Shylla (ban kwai ha dwar U Blei) ha ka khep ba u dang bat ïa ka iktiar jong u Khlieh Rangbah (CEM) jong ka Khasi Hills Autonomous District Council (KHADC) ryngkat kiwei kiwei ki para rangbah. Naduh ba la seng la buh ïa ka thong ban pynneh pynsah ïa ka riti dustur kheiñkur kheiñkha na ka kmie lyngba ka KHADC.
La ong ba ha kane ka jingpyrshang la ïa takhuh shibun ki dieng pyngkiang, hynrei khatduh la lah ban pynlong aiñ ba la tip kum ka Khasi Hills Autonomous District (Khasi Social Custom of Clan Lineage) Amendment Act, 2023. Hynrei ki jingeh ki dang ïai tyllep bad ka Synjuk Ki Rangbah Kur Ka Bri U Hynñiewtrep ka la pynlong ïa ka Dorbar Bah III ha ka 27 tarik Nailur 2025, ha kaba la ïatai sani halor kane ka phang ryngkat u Kongsan Bah Strongpillar Kharjana, Chairman ka KHADC, uba la kdew byllai ki jinglong jingman ha ka imlang sahlang ba ïa tyngkhuh manla ka sngi. U la maham ba ka longrynïeng jong u kñi ka long kaba donkam ban tei ïa la ka kur ka jait lyngba ka sneng ka kraw bad da ka jingkitkhlieh bad ban long na lade hi ka nongmuna na ka bynta ka pateng longkur longjait.
Kiwei pat ki kynrem ba la don lang ha ka Dorbar Bah III jong ka Synjuk Ki Rangbah Kur ki long u Bah MB Kharlukhi, Myntri ka Hima Mylliem, u Dr KM Syiemlieh, Syiem Khynnah Hima Nongkhlaw bad Khlieh rangbah ka Synjuk ki Hima Khasi, u Bah Robertjune Kharjahrin, u Bah Pyniaid Sing Syiem, CEM barim ka KHADC, u Dr BPS Toi, rangbah kur uba la pynïaid ïa ka riti pynskhem ïa ki dkhot nongkitkam ka Synjuk ki Rangbah Kur na ka bynta ka samoi 2025 haduh 2028.
Ha ka sien shong kaba ar la shim bynta da ki rangbah kur na kylleng ka thaiñ ba kynthup ïa u Bah D Donstan Khonglah na War Jaiñtia, Bah Ploster Syiem na Ri Bhoi bad katto katne ki rangbah na ka lympung paidbah kiba la ïa kdew bad pyni ïa ki lad ki lynti ban pynneh pynsah bad ban ïada na kino kino ki jingpyrshang kiba pynbyrsieh ïa ka riti dustur tynrai.
Ha kaba jied ïa ki dkhot nongkitkam thymmai ba la pynïaid da u Dr BPS Toi, ka lympung ki rangbah kur ha ka Dorbar Bah ki la mynjur ïa u Bah RL Kharpran kum u President, Bah Raphael Warjri kum u Secretary, Bah Aristotle Lyngdoh, Bah Ploster Syiem bad Bah D Donstan Khonglah kum ki Vice President, Bah Erland Sun kum u Treasurer, Bah Rapionglang Blah kum u nongaiktien ryngkat bad khathynriew ngut ki dkhot nongkitkam jong ka Synjuk Ki Rangbah Kur.
