Shillong, Nailur 28
Ka Pay For Right Football Academy (PFR) ka la pynjem khnap ïa ka Lapalang da 11-1 kol, katba ka Mawlum Tyrsad ka la ïakhun tyngeh ban pynliem noh ïa ka Jakrem da 3-2 kol, ha ka jingïakhun jong ka Group A & B ha ka 1st Meghalaya Women’s State League 2025 ba la pynïaid da ka Meghalaya Football Association ha ka sngi Saitjaiñ.
Ha ka jingïakhun jong ka Group-A, ka nam jop jong ka PFR ka la wan hadien ba ka Nisilia Majaw marwei ka la khur da ar tylli ki hat-trick da kaba thep haduh 6 kol, ha kaba tang ha ka kylla step, ka la ïoh ba kan thep 5 kol (10, 13 (P), 33, 41, 45) bad sa kawei pat ha ka kylla miet (72). Ïa ki kol kiba sah la ïoh ban thep da ka Makrisha (19, 43, 56 (P) & 58) bad sa shi kol la thep da ka kapten ka kynhun ka Aetisha Lytan (67). Hynrei ka Lapalang ka la lait thaw na ka jingshah brut ha kaba ka la pynphai kylla lyngba ka Shailinda Dkhar (61).
Kumban shu bynrap ba ka PFR ka rung sha kane ka lympung hadien ba ka la rah ïa ka nam lahduh ha ka Women’s League 2024 jong ka Shil-long Sports Association, katba ka Lapalang ka dei kaba rah ïa ka nam lahduh jong ka lympung ïalehkai ba la pynlong da ka Riwar Mihngi Football Association.
Haba phai pat sha ka jingïakhun ba la long ha Mawlum Tyrsad, ka Jakrem (ka lahduh ha ka lympung ba la pynïaid da ka Mawkyrwat District Sports Association), ki la jam shakhmat ban tam da shi kol ha ka minit kaba 50 ba la thep da ka Ïaphishisha Marbaniang (2), hynrei ka Mawlum Tyrsad ki la pynphai kylla lyngba ka Naisha Nongrum (45+1)
Haba wan bteng ïa ka kylla miet, ka Jakrem sa shisien ki la tam biang shakhmat da kaba thep ïa ka kol kaba ar lyngba ka Chibalsaldei Sangma (50), ïa kaba kum ka kynhun kim shim la lah ban tehlakam ïa ki ‘thei ka Mawlum Tyrsad, kiba la ïeng ïakhun tyngeh ban thep kylla pat da ki ar kol ba la wan lyngba ka Balawanbiang Khongsit (56) bad ka Ibashemba Khongsit (69).
