Shillong, Nailur 28
Ka lympung ïalehkai First Division Football League 2025 ban pynïaid da ka Shillong Sports Association (SSA) kan sdang mynta ka lah sngi U Blei ha kaba ka Meghalaya Police (MLP) F.T kan ïakhun pyrshah ïa ka Nongrah SC ha ka por 1:30 mynsngi ha SSA Stadium.
Ki kynhun ki ban shim bynta ha kane ka lympung ki don 10 tylli kiba kynthup ïa ka Nongthymmai, Ryntih, Mawikhar, Pohkseh, Nongkrem, Nongkseh, Meghalaya Police F.T, Lawsohtun, Mawtawar bad ka Nongrah SC.
Kane ka aïom ïalehkai kan long kaba itynnad lyngba ka jingpynkhlaiñ jong ki kynhun bad khatam eh ka Nongkseh SC da kaba ka la soi dangshen ïa bun bah ki khlur ïalehkai kynthup ïa u kapten barim ka Shillong Lajong FC u Hardy Cliff Nongbri. Kumba ka paw ka thong bad ka jingangnud ka Nongkseh ka long ban rah ïa ka nam lahduh bad ban ïoh rung sha ka Shillong Premier League.
Ha ka sngi kaba bud ka Mawtawar kan ïakynduh pyrshah ïa ka Mawkhar. Ha ka 1 tarik u Risaw ka Lawsohtun kan ïakynduh pyrshah ïa ka Nongthymmai, ha ka 3 tarik ka Nongkrem ïa ka Ryntih, 4 tarik ka Pohkseh ïa ka Nongkseh nalor kiwei pat ki jingïalehkai ki ban sa bteng biang hadien.
Kat kum ka kyrwoh ba la pyllait da ka SSA, la ong ba ïa kane ka lympung yn pynlong tang kawei ka wat jingïakhun (one leg) ha kaba ka kynhun ka ban bat ïa ka kyrdan ba hakhlieh kan long ka lahduh bad kaba wan ba-ar, kin ïoh rung sha ka SPL na ka bynta ka aïom ka ban wan, katba ki ar tylli ki kynhun ki ban wan ha ki kyrdan ba shatrai kin shah pynhiar sha ka Second Division.
