Jowai, Nailur 28
Ki nongïasaid aiñ kiba mihkhmat ïa ka seng Khooid Yaka Wah Myntdu hakhmat ka NGT Principal Bench ha New, Delhi halor ka mukotduma pynneh pynsah ïa ka wah Myntdu ki pynpaw ka jingpangnud ban ïohi ïa ka jinglong jingman jong ka wah Myntdu.
Ki nongïasaid aiñ kiba napoh Supreme Court ba kynthup ka Srishti Agnihotri, Advocate on Record bad Tara E Kurien kila pynpaw ïa kane ha ka jinghiar jurip ïa ka wah Myntdu ha ka 27 tarik mynta u bnai.
Kane ka jinghiar jurip kala wan long hadien ba ka seng Khooid Yaka Wah Myntdu kala ujor mukotduma hakhmat ka NGT Principal Bench ha New, Delhi halor ka jingshah ktah ka wah Myntdu na ka jingpyntrei ïa ka surok Jowai Bypass na Khliehtyrshi sha Treiongriang.
Haba ïakren bad u President ka KYWM Ma Khroo L Pariat u la pyntip ba ka jingjurip ka sdang na Khliehtyrshi, Pynthorneiñ, liar Pamkam ter ter haduh Treiongriang bad leit jurip ruh ka jaka pyllang um jong ka tnat PHE.
U la pyntip ruh ba ki nongïasaid aiñ ha ka jingjurip bniah ïa ki sawdong sawkun ka wah Myntdu ki pynpaw ïa ka jingpang nud ban ïohi ïa ka jinglong jingman jong ka wah Myntdu bad maki ruh ki sngew ba ka lad ka lynti ka dei tang lyngba ka NGT ban ïada ïa ka wah.
Hadien ka jingjurip, la pynlong ïa ka jingïalang phylliew jingmut halor kumno ban pynbha pynitynnad ïa ka wah Myntdu ha Conference Hall ka GHM ha ka jingdonlang ki waheh shnong, ki nongïalam jong ka Jaiñtia Fishing Environment Protection Society kumjuh ki nongïalam ka Seinraij Jowai, bad ki nongïalam ka Synjuk Ki Waheh Shnong Jowai nalor kiwei.
Nalor ki jingpynbha pynmiat ïa ka wah Myntdu, la ïakren kyrpang ruh halor ki lad ki lynti ban ïada ïa ki jakhlia kiba mih na ki longïing longsem kiba long ki jakhlia kiba nang pynsniew shuh shuh ïa ka wah Myntdu.
U la pyntip ruh ba ha ka 17 tarik Risaw (October) ka NGT kan shong bishar biang halor kane ka mukotduma bad ka tnat PWD kan hap ban ai jubab halor ka khyndew bad shyiap ba la pyntuid ha wah Myndtu na ka jingpyntrei ïa katei ka surok.
