Shillong, Nailur 28
Ki nongtuh ki la prong ïa ka ïingsah jong ka khlur ïakura barim jong ka ri, ka Mary Kom ha ka nongbah Delhi, ha ka por ba ka dangwan shim bynta ha ka prokram jong ka 4th Sohra International Half Marathon kaba la long ha ka sngi Saitjaiñ.
Ha ka por ba ka dangai jingkren hashwa ban sam ïa ki khusnam sha ki nongjop jong katei ka jingïakop mareh, ka Mary ka la ïohpdiang ïa ka jingkren na u nongtrei jong ka lyngba ka mobile phone. Te kumta ka la sangeh shipor ban ai jingkren bad hadien ka la pynpaw hakhmat ki bor pynïaid bad ki paidbah ba la ïoh jingtip ba ki don ki nongtuh kiba la prong ïa ka jaka sah jong ka, hynrei kam shym la pynpaw eiei la ka la shah tuh ne em ha katei ka jingjia.
