Jowai, Nailur 28
Ka Bamkamar bad Laru ki la jam sha ka semi final ha ka lympung ïalehkai 2nd Division Football Tournament ba la pynïaid da ka Thadlaskeiñ Sports Association (TSA) hadien ba ki la khur jingjop ha ka sngi Saitjaiñ ha Multi Sports Copmlex, Wahïajer.
Ha ka jingïakhun quarter final ka Bamkamar ka la pynliem noh ïa ka Nongdhar da 3-2 kol. Kane ka nam jop ka la wan urlong lyngba ka hat-trick ba la thep da u Meshanmi Nongrum ha ka minit 16, 22 & 63, katba na ka Nongdhar la thep ar kol da u Hayobiang Dkhar (24 &35).
Ha ka jingïalehkai kaba bud, ka Laru ka la pynliem ïa ka Myngkrem lyngba ka tie-breaker da 4-3 kol, hadien ba ki la ïakhaid mar mar 1-1 kol.
Ka Mynkrem ka la pynkhih jar nyngkong eh ha ka minit kaba 2 lyngba u Yomitre Khynriam, katba ka Laru ka la pynphai ha ka minit 36 lyngba u Bahnah Suting.
