Jowai, Nailur 28
Ki pulit ka Jylla ha ryngkat ka kynhun Anti-Narcotic Task Force (ANTF) hapoh ka jingïalam u Additional Superintendent of Police ka West Jaiñtia Hills, u Bah Jason Mairom, MPS ki la ïoh ban kem noh ïa arngut ki nong Manipur bad ïoh ban kurup bun bah u drok heroin uba shongdor haduh T.2.5 klur.
Ki pulit hadien ba ki la ïoh ïa ka jingtip kaba thikna, ki la pynlong ka jingpynap shrip ha ka miet synñia jong ka 27 tarik Nailur hadien ba ki la pynïeng noh ïa kawei ka kali Tata kaba don ïa u registration number ML05-K-2315 hajan Phramer Police Traffic Cell katba ka dang wan na ka thaiñ Khliehriat da ka jingthmu ban leit sha Jowai.
U Superintendent of Police ka West Jaiñtia Hills u Jagpal Singh Dhona u la ong, ha ka jingtalasi, ki pulit ki la ïoh ban kurup noh haduh 50 tylli ki synduk sabon ba la thep ïa u drok heroin uba don ka jingkhia kaba haduh 512.63-gram ïa kiba la buhrieh bha ha ki bynta jong ka kali.
Ki pulit ki la ïoh ruh ban kurup ïa ka pisa India T.6775, ka pisa South Korea ?3,000, ka poisa ka ri Kazakhstan ?50,0, ka pisa Burma 10 Kyat bad artylli ki mobile phone.
Hadien ki pulit ki la kem noh ïa kine ki arngut hapoh ki kyndon jong ka Narcotic Drugs and Psychotropic Substances (NDPS) Act bad ka jingtohkit ka dang ïaid shakhmat ban lap dien shuh shuh ïa kane ka kam khaïi drok bad ka jingdon bynta bad kiwei pat ki jylla.
