Venezuela, Nailur:
Ka Venezuela, kaba don ha ka jingpynkhreh kaba jur halor ka jingpynjari ïa ki shipai jong ka US ha ki rud duriaw jong ka, kaba la pynmih ïa ka jingtieng ïa ka jingwan hiar thma, kan pynlong ïa ki jinghikai ban pynkhreh na ka bynta ki jingjia ba sngewsih ha ka por ba u President Nicolas Maduro u dang pyrkhat ban khot ïa ki bor ba kyrkieh.
U President Maduro u la khot ïa ki jingïalehkai ha ka Sngi Palei, katto katne kynta hadien ba katto katne ki jingkhynñiuh jumai ki la pynkhihwin ïa ki paidbah kiba la shah pynkhihwin lypa namar ki jinghiar thma ba shyrkhei jong ka US ïa ki lieng pynïap drok jong ka Venezuela.
U president jong ka America, U Donald Trump, ula phah 8 tylli ki jhad thma bad kawei ka jhad um, kaba pyndonkam da ka bor nuclear, sha ka thain shathie jong ka Caribbean, kum shi bynta jong ka jingthmu ba la pynpaw, ban iakhun pyrshah ia ka jingkhaii drok.
Ki shipai jong ka US, ki la pynjot ym duna ia ka lai tylli ki lieng, kiba la suba ba ki don ki drok ha Caribbean, ha kine ki taiew ba ladep, ha kaba ki la pyniap ia palat shispah ngut ki briew, ha katei ka jingleh, kaba la kynthoh, ba ka dei ka “jingpynïap khlem akor” da ki riew shemphang jong ka UN.
Mynta, ki heh shipai jong ka US, ki dang shna ia ki lad ki lynti ban thombor ia ki nongkhaii drok hapoh ki khappud jong ka Venezuela, ong ka khubor jong ka NBC kaba kdew ia ki saw tylli ki tyllong khubor kiba tip bha ia ki jingiakren.
Ki jingshah thombor ki lah ban jia “ha ki katto katne taiew ban wan”, watla u Trump um pat mynjur ïa ki, ong ka khubor.
U President Maduro, uba U President Trump, u kynnoh, ba u dei uba ialam ia ka kynhun narco cartel, bad suba ba ka Washington, ka buddien ia ka jingpynkylla ia ka rukom synshar.
Da ki hajar ngut ki nong Venezuela ki la ïasoh bad ka kynhun lehnoh riew paidbah kum ka jingkynthoh ïa ka jingkhot jong u President Maduro ban pynkhlaiñ ïa ki bor ïada jong kane ka ri kaba la kyrduh pisa.
Bun ki la iashim bynta ha ki jinghikai tiar ialeh ba la pynlong ha ki jaka sah shipai bad ha ki jaka ba marjan.
U President Maduro u la kdew ïa ki “jingbyrngem” jong ka US haba u la khot ïa ka jingïalehkai kaba sdang naduh ka por 9:00 baje mynstep jong ka sngi Saitjaiñ ban tynjuh ïa “ka jinglong ba la pynkhreh jong ki paidbah na ka bynta ki jingjia ba sngewsih jong ka mariang ne kano kano ka jingïalehkai tiar.”
Ki skul bad ki hospital ki dei ban shim bynta “ban pynkhreh ia kano kano ka jingjia,” la ong u president.
Ha ka sngi Balang, u la paw ha ka telebishon jong ka sorkar ryngkat bad ka folder kaba saw ha kaba la thoh: “Ka hukum kaba pynbna ia ka jinglong jingman jong ka jingkhihwin shabar ha kylleng ka ri.”
Ka riti synshar jong ka Venezuela ka ailad ia kum kane ka hukum lada jia ba don “ka jingialeh nabar kaba buh jingma jur ia ka jingshngain jong ka jaitbynriew, ki nongshong shnong jong ka, ne ki tnat treikam jong ka.”
