Shillong, Nailur 28
Ha ka jingïakynad kaba jur bha ha Dhupdhara, Goalpara District, saw ngut ki snar runar ki la shah siat ïap ha ki pulit ha khappud jong ka Assam bad Meghalaya.
Katkum ka jingïathuh jong u Senior Superinte-ndent of Police (SSP), Goalpara u Nabaneet Mahanta u la ong, ba ha ka jingkhynra ki pulit ki la ïoh ban kurup ïa kawei ka kali Renault Triber kaba don ïa u registration number AS02-AE-2633 ha ryngkat bad saw tylli ki pistol bad san tylli ki mobile phone.
U Mahanta u la ong ba katei ka jingïasiat ka la jia hadien ba ki saw ngut ki runar kiba don hapoh ka kali ki la ïa siat suloi bad ki pulit. Hapoh ka jingïalam jong u Nupur Ranjan Neog, Co-District Superintendent of Police jong ka Dudhnoi, bad u Abhilash Bora, CDSP jong ka Western Goalpara, ki kynhun pulit jong ka Dhupdhara bad Agia ki la sdang ïa kane ka jingkhynra.
Kine kiba ïap ki dei kiba la tip kyrteng kum u Zahidul Islam na Muka-lmua ha Nalbari District, u Saburuddin Ali na Larujan ha Boko, Chengbart Sangma na Puthimari ha Krishnai bad u Mukunda Rabha na Chitukona-Damra ha Dudhnoi.
Kumba long mynta, ïa ki metïap jong kine ki runar kiba la shah siat ïap la buh ha Adarsha Hospital ha Dhupdhara, bad shen kin sa rah noh sha Goalpara’s Shaheed Nidhannuram Rajbanshi Civil Hospital na ka bynta ban leh ïa ka post-mortem.
La ïathuh ba kitei ki runar ki dei kiba la donkti ha ka kam runar dangshen ha Tiplai, Dhupdhara. Ki la don ruh ka jingthmu ban ap ha khappud Assam-Meghalaya bad ki thmu ban rahbor ïa ki nongkhaïi. ïa kine ki runar la pynngat ha ki kyndon bapher bapher ba kynthup ka jingdawa pisa, ka jingrahbor, bad ka jingpynïap briew ha ka jingïateh kular na kylleng ki district bad kiba la shah kem ruh mynshwa.
U Senior Superintendent of Police (SSP), u Mahanta u la ïathuh ba ha ka por mynstep jong ka sngi U Blei, kumba ha ka por 5 baje dang step, kane ka kynhun ki runar ka la siat ïa ki pulit ha Ghiladubi, Dhupdhara.
Ka kali jong u Western Goalpara SSP ruh ka la shah pynjulor na ka jingshah siat kuli. Ki pulit ki la pynphai kylla, ha kaba ki la ïoh ban siat pynïap ïa baroh saw ngut ki runar. La ïathuh ruh ba napdeng jong ki, ki don kiba la mynsaw jur bad la rah sha Adarsha Hospital, Dhupdhara, hynrei ki doktor ki la pynbna ba ki la khlad.
