Shillong Nailur 28
U Babu Wanbok Rani u la ong ka Sorkar kam don ki polisi ban pynkut noh ïa ki jingeh ki nonghikai Ad-hoc ki ba mih surok ban dawa ïa la ka hok, hynrei ka shu sngap man-man na ka por sha ka por bad teng-teng haba peit ïa kane, ka la long thik kumba ka sorkar ka ai ‘enhancement’ ha ka rukom ka ba khlem pynhun ïa ki nonghikai.
Ïa kane u Babu Rani u la pynpaw ha ka jingïakren bad U Nongsaiñ Hima ha jaka shong ïakhih ki nonghikai Ad-hoc ha madan Malki kaba la neh mynta shitaiew, ka jingïakhih jong ki ka long halor ba ki dawa ban kyntiew kyrdan sha ka deficit system.
U la ong haduh mynta ka sorkar kam pat ong eiei halor ka jingshong ïakhih jongki lait noh tang shishien ba ki ïa shong jingïalang bad u Myntri ka tnad pule puthi u Bah Lakmen Rymbui ha ka 23 tarik Nailur ha kaba katei ka jingïalang ka khlem ai jinghun satia ïa ki bad ka ba pynlong ïa ki ban iai bteng ïa ka jingïakhih haduh mynta.
U Babu Rani u la ong, ki kwah ba ka sorkar kan ai ïa ki da ka ‘permanent solution’ ha kaba kum ki nonghikai kin ym mih surok shuh ha ki sngi ki ban wan, namar kum ki nonghikai skul ki don ka jingkitkhlieh na bynta ka Ri bad ka Jaitbyndriew ban pynkiew shuh shuh ïa ka jingnang jingstad hapoh ka Jylla.
Haba peit katkum ka Performance Grading Index (PGI) ka Jylla Meghalaya ka la hiar shatrai duh, kane ka la pynlong ïa ki nonghikai ba kin don ka jingsngew, hynrei ha kawei pat ka liang ki la ai ka jingshakri kaba paka ha ki khun ki kti ki nongshong shnong kiba don ha kylleng ka Jylla hynrei namar ka jingthngan jong ka kpoh kim bynse ban mih surok ban dawa ïa ka hok. U la ong
Nalor kata u la ong, Haba phai ïa ka jingïaidlynti jong ki Ad-hoc Skul, ha ki snem ba la leit kum ha u snem 2008 ka sorkar ka la pynkiew ïa ka tulop jongki na ka 5 hajar sha ka 8 hajar bad tang hapoh lai snem ha u snem 2011 la pynkiew sha ka 10 hajar bad ha u snem 2016 ka sorkar ka pynkiew 100% kaba mut na ka 10 hajar sha ka 20hajar tyngka hynrei kaba sngewsih ka long ba ha u snem 2022 pat ka sorkar ka khlem khot ban ïapynbeit katno ka ‘enhancement’ kaba dei ban ai sha ki nonghikai.
U Babu Rani u la pynpaw ïa ki jingïakynduh jong ki kum ki nonghikai namar ka jingiaid ka por, ba ka jingai ka sorkar kam ïahap shuh, namar ki jinglud ki la ïapher na ka por sha por bad dei na kata ka daw ba ki nonghikai ki hap ban mih surok ban dawa na ka sorkar.
Shuh-shuh u la ong, ka jingmih ki nonghikai ban ïakhih dei ba ka sorkar kam don mon, lada ka sorkar ka leh, ymdon jingeh, namar lada ka sorkar ka mon, ka lah ban shim da ka ram na ka bynta ban pynbit pynbiang ïa kano kano ka tnad treikam jong ka bad ka tnad pule puthi ka dei kawei na kiba kongsan tam hynrei kaba lyngngoh ka long ba ka sorkar Meghalaya kam don ka mon ban pynkiew ïa ka pule puthi ha ka Jylla.
U Babu Rani u la ong, ha ka jingiohi ka jong u kum u nonghikai bad kum u nongshnong shnong jong ka Jylla, ki nongïalam kiba don ha ki tnad Sorkar kim ju buh skul ïala khun hapoh ka Jylla bad dei na kane ka daw ba kim don ka jingkitkhlieh na ka bynta ki paidbah.
“Lada ka sorkar kam lah ban pynurlong ïa ki jingdawa jong ngi, ngin ym mih na kane ka jaka bad ngin ym kynrandien da lei-lei ruh. la ong u Babu Rani.
