Shillong, Nailur 28
U nongmareh ba paw ka Jylla u Kresstarjune Pathaw u la wan ha ka kyrdan ba-ar ha ka 21K Elite jong ka 4th Sohra International Half Marathon kaba la long ha ka sngi Saitjaiñ u Nailur 2025 ha Sohra.
Une u rangïalehkai uba na ka shnong Umthlong Nongtliew kaba ha Eastern West Khasi Hills u la lah ban pyndep ha ki 1:03:29 sekhon ha ka liang ki shynrang. Ïa ka kyrdan ba nyngkong la ïoh da u Dinesh Kumar uba la pyndep ha ki 1:03:24 sekhon bad balai u Ravi ha ki 1:05:30 sekhon.
Ha ka 21K Elite jong ki kynthei la jop da ka Tamsi Singh kaba la pyndep ha ki 1:15:48 sekhon, ba-ar ka Tsehay Desalegn Adhana ha ki 1:16:17 Bad balai ka Sangeeta Pal ha ki 1:21:03 sekhon. Katba ïa ka kyrdan basaw la ïoh da ka Iutiful Tympuiñ kaba la pyndep ha ki 1:42:43 sekhon.
Haba phai sha ka 21K Meghalayan ha ka liang ki shynrang la jop da u Ïohborlang Nongspung da kaba pyndep ha ki 1:05:23 Sekhon, ba-ar u Monas Bongrung ha ki 1:06:37 sekhon bad balai u Wanbok L. Mawphlang ha ki 1:06:40 sekhon.
Ha ka liang ki kynthei jong ka 21K Meghalayan ki kynthei la jop da ka Phyrnai Kyndait kaba la pyndep ha ki 1:27:29 Sekhon, ba-ar ka Filinza Hansepi ha ki 1:29:06 sekhon bad balai ka Bethlyne Grace Makri ha ki 1:34:08 sekhon.
Kumba ka paw kane ka Sohra International Half Marathon ka la long kaba jop haba la wan shim bynta da palat 11,000 ngut ki nongmareh, kaba long kaba heh tam ha ka histori jong kane ka jingïamareh.
Kane ka jingiakop ka kynthup ia ka 21k Half Marathon, 10 km bad ka Run For Fun kaba 5km.
Ka jingwan jong ki nongïashim bynta mynta u snem ka la pyni ïa ka jingkiew haduh palat 5,000 ngut ki nongïalehkai haba ïanujor bad u snem ba la dep kiba don tang 7000 ngut, na kylleng ka ri India bad kumjuh nabar ri.
Ha katei ka sngi la ïadon lang ka khlur nongïakura barim jong ka ri ka MC Mary Kom kaba la khur takma teng ha ka Olympic bad kaba la jop 6 sien ha ka World Championships ryngkat bad u Chief Secretary ka Jylla u Bah Donald Philips Wahlang, ha kaba ki la sam ia ki khusnam sha ki nongjop ha la ki jong ki kyrdan iakop jong ki shynrang bad kynthei, ha Seven Sisters Falls.
