Shillong, Nailur 28
U khlur ak phlim ka Bollywood u Ahaan Panday u tyngshop uba ak ha ka phlim Saiyaara kaba ïaid bha ha ki cinema ha India bad kylleng ka pyrthei u la wan poi sha Shillong mynta ka taïew.
Katkum ki dur bad ki durkhih ba la saphriang ha rynsan social media, la ïohi ba u Ahaan bad u director ka phlim Saiyaara u Mohit Suri ki la poi sha Shillong.
La ïohi ha ki durkhih ba ki paidbah ki la ïaknieh shondur haba u rung ha kawei ka dukan ha Shillong. La ïohi ruh ïa ka durkhih ba u ïakren bad uwei u heprit.
Shuh shuh la ïohi ha ka dur ba la pyllait ha instagram ba u Ahaan u la shondurlang bad u trai ka Tripura Castle Shillong.
La ïohi ruh ki dur ba la saphriang ba u Ahaan u la ïoh ban shondur bad ki riew paidbah ha The Yeastern Civilisation kaba don ha Laitumkhrah.
Katkum ka khubor ba saphriang ha social media, kane ka jingpoi jong u ha The Yeastern Civilisation Laitumkhrah Shillong ka dei ka jingïakhawai hashwa ba un leit phai noh sha Mumbai hadien ba u la sah katto katne sngi ha Shillong.
Ki khubor ki ïathuh ba haduh mynta ym tip na kaei ka daw ba u Mohit Suri bad u tyngshop Ahaan Panday ki wan sha Shillong.
Sa kawei ka khubor kine ar ngut ki wan sha Shillong, ki lah ban wan jurip ïa ka jaka hashwa ba kin shna phlim thymmai ha Shillong.
Kumban shu pynkynmaw ka phlim Saiyaara kaba la ak da u Ahaan Panday bad Aneet Padda kum ka puron ka dei ka phlim kaba baroh ki paidbah ki itynnad haba ki peit ha Cinema haduh ba kane ka phlim ka la kamai 579 klur haba la pynlut tang 45 klur tyngka.
Ïa kane ka phlim Saiyaara la long trai da ka Yash Raj Films ba la pynlut da u Akshaye Widhan ba la direct da u Mohit Suri.
Ka jingitynnad kane ka phlim Saiyaara ka dei na ka khana bad ki jingrwai kaba ki samla kiba bun ki la shad reels ha instagram.
Haba ïoh ban ïakren bad uwei u nongtrei jong ka The Yeastern Civilisation kaba don ha Laitumkhrah, u la ïathuh ba ki la ïoh shondur ïa une u tyngshop bad director ka dei ha ka por ba u wan bamja miet ha restaurant ba trei ma u.
U la ïathuh ba une u tyngshop u wan sha Shillong ban ringdur ïa kawei ka phlim thymmai hynrei ka puron ka khlem wanlang ka shong ha jaka sah.
U la ïathuh ba ki bun ki paidbah ki dang mut ba shu shna ïa ka dur bad u Ahaan hynrei ka dei kaba shisha namar ki la ïoh ban shondur bun ngut.
