Shillong, Nailur 28 (UNI)
U President ka Indian National Congress (INC), u Mallikarjun Kharge, un sa wan jngoh ïa ka Jylla ha u bnai ban wan, kum shi bynta jong ki jingpyrshang ka seng ban pynkhie im biang ïalade ha kane ka Jylla ‘riewlum ha kaba kane ka seng heh ka ri ïa mynta kam don nongmihkhmat shuh hapoh Ïingdorbar Thawain ka Jylla – kaba dei ruh ka sien ka banyngkong eh ba ka seng kan mad ïa kane naduh u snem 1972.
Ka State Congress Unit ïa mynta ka dang don hapdeng ka jingpynbeit thymmai ïa ka rukom treikam, ha kaba ki jingïakren ki dang ïaid ha Delhi ban saiñdur ïa ka lynti ïaid na bynta ka lawei jong ka.
Ka seng ka ju don ha ka Liang Pyrshah ne Liang Synshar hapoh ka Jylla ha kine ki sanphew snem ba la leit bad ka kam ju duh ban shah jied MLA ki ban mihkhmat hapoh ka Ïingdorbar Thawaiñ ka Jylla.
Hynrei ka jingnang hiar jong ka Congress ha ka Jylla ha kane ka kynti ka long kaba kyndit haduh katta-katta, naba ki lai ngut ki MLA jong ka – u Dr. Celestine Lyngdoh, u Bah Gabriel Wahlang, bad Bah Charles Marngar – ki la leit pynïasoh noh sha ka National People’s Party (NPP) ha u Nailar, 2024, kaba la pynlong ïa ka seng ban sah noh tang bad uwei u nongthaw aiñ ha ka Ïingdorbar kaba 60 ngut ki dkhot.
Hynrei kaba sngewlyngngoh ka long ba wat une u MLA ba marwei ka Congress ruh, u Bah Ronnie V. Lyngdoh, u la leit pynïasoh noh sha ka NPP (ka seg kaba synshar) ha u bnai Naitung mynta u snem, kaba la pynlong ïa ka seng ban duh lut ïa baroh ki nongmihkhmat jong ha ka Ïingdorbar ha ka sien ka banyngkong eh naduh ba ka Meghalaya ka la ïoh ïa ka Jylla lajong ha u snem 1972.
Ka jinghiar jong ka seng ka dei kaba la pynshong nongrim namar ka jingbym lah (jong ka) ban khanglad ïa ka jingphet seng bad ban ai ïa ka jingïalam kaba treikam pura, kaba pynpaw ïa ka jinglong kaba kham ïar jong ka jingtlot jong ka ha ka Thaiñ Shatei Lam Mihngi.
Ka jingwan jngoh jong u Kharge, kaba la khmih lynti ba kan neh ar ne lai sngi, la shim ba ka dei ka jingwan jngoh kaba kongsan bad ka dak jong ka jingangnud jong ka seng ban pynkhie im biang ïalade ha ka Jylla.
Ïa kine ki jingpyrshang ban pynbeit thymmai ïa ka Congress la shim ba ka dei ka jingpyrshang kaba khatduh ban pynïasoh biang bad ki paidbah bad ban ïoh bat biang ïa la ka nongrim ha Meghalaya.
“Ha kane ka jingwan jong u sha Meghalaya, u Khagre un sa ïakynduh ïa ki nongïalam ka seng hapoh ka Jylla ban ïakren halor ka jingthung ïa u President bathymmai jong ka MPCC (Meghalaya Pradesh Congress Committee) bad ban pynbeit thymmai ïa ka kynhun jong ka ha ka Jylla da kaba buh jingmut ïa ka ilekshon ban wan sha ka GHADC (Garo Hills Autonomous District Council),” ong uwei u nongïalam ba rangbah ka Congress u bym shym la kwah pynpaw kyrteng.
Katkum ka jingong u nongïalam ka Congress, bad MP ka seng, u Rahul Gandhi u la pynpaw ïa ka jingsngewkhia kaba jur halor ka jingphet seng ki MLA ka Congress sha ka NPP bad ka jingbym lah ban leh bha jong ka seng ha ka ilekshon ha u bnai Rymphang, 2025 sha ka Khasi Hills Autonomous District Council bad Jaiñtia Hills Autonomous District Council.
