Dhaka, Nailur:
3 ngut ki la duh ei noh ïa ka jingim ha Bangladesh bad da ki phew ngut ki la mynsaw ha ka Sngi U Blei, hadien ka jingkulmar kaba jur kaba la jia ha ki bynta lum ba Shatei Lam Mihngi jong katei ka ri hapdeng ki trai ri trai muluk bad ki nongshong shnong Bengali. Watla ki bor pyniaid ki la pynjur ïa ka jingpahara halor ka jingkynnoh kaba la paw pyrthei halor ka jingshah leh be-ijot jong kawei ka khynnah rit ha katei ka thaiñ.
Kumta la ong, na ka liang ki pulit, ki la pynthikna halor ka jingïap jong kitei ki 3 ngut kiba ym shym la batai bniah ïa ka jinglong- jingman jong ki, katba ki nongshong shnong bad ki nongsakhi ki la ïathuh ba baroh arliang mamla ki la ïaleh pyrshah, ha kaba ki la thang ïa kiba bun tylli ki jaka treikam bad ki ïing hapoh ka distrik Khagrachhari, kaba don kumba 270 kilomitar na ka phang Shatei Lam Mihngi jong ka nongbah Dhaka.
Kitei ki jingïakynad ki la mih hadien ka jingkynnoh ba la don kawei ka kynhun kaba la leh be-ijot ïa kawei ka khynnah skul klas 8 hapoh ka distrik Khagrachhari ha ka Sngi Ba-ar jong ka taiew ba la lah, kawei na ki lai tylli ki thaiñ lum jong ka Chittagong Hill Tracts kaba don ha khappud bad ka India bad ka Myanmar. Ka tnat kam pohïing jong Bangladesh, ka la ïathuh ba 13 ngut ki shipai bad 3 ngut ki pulit, ki la mynsaw ha katei ka jingïakynad kaba la mih ha katei ka sngi.
Ka jingkulmar, ka la jia nyngkong eh ha ka jaka treikam jong ka Khagrachhari, ha kaba ki trai ri trai muluk, kiba kham bun ki dei na ka jaitbynriew Chakma bad Marma, ha ka sngi saitjaiñ, ki la pynjari ïa ka jingkhang lynti da kaba thang ïa ki tyndong kali, ki tynrai dieng bad ki nar, kaba la pynlong ïa ki bor synshar ban pynjari ïa ki kyndon khang ïa ka leit ka wan bad ki jingïalang paidbah.
Hynrei kitei ki lai ngut kiba ïap ki dei na ka thaiñ Guimara, kaba jngai 36 kilomitar shaphang shathie na Khagrachhari, namar ka jingïakynad ka la saphriang shabar jong ka headquarter jong ka district watla ki shipai shipai bad paramilitary Border Guard Bangladesh (BGB) ki don ka jingpahara ha ryngkat ki pulit.
La kynnoh ba katei ka khynnah ka la shah leh beijot ha ka kynhun ha ka por ba ka wan na ka jaka pule shimet bad la ïathuh ba la lap ïa ka da ki kmie ki kpa bad ki para marjan jong ka ha ka por shiteng miet ha ka jinglong ba khlem tip ei ei ha kawei ka jaka ba kyrpang ha katei ka sor.
La sumar ïa ka ha kawei ka jaka sumar jong ka thaiñ katba hadien ki pulit ki la kem ïa uwei u samla Bengali da ka jingïarap jong ki shipai. La suba ba u dei uwei na ki nongleh beijot bad mynta la tohkit ïa u ha ka jingshah set phatok kaba 6 sngi katkum ka hukum jong ka ïingbishar.
Ka bor synshar district ha ka sngi saitjaiñ ka la pyntreikam ïa ka kyndon 144 jong ka aiñ pynshitom bein (CrPC) kaba khang ïa ki jingïakhih bad jingïalang ba la pynbeit ryntih ha ka jaka treikam jong ka Khagrachhari bad ki shnong ba marjan jong ka hynrei ki jingkhang kiba bun kim shym la lah ban pynjem ïa ka jingkulmar.
“Lai ngut ki briew ki la ïap na ka jingshah siat suloi ha Guimara. Ia ki met ïap jong ki la buh ha Khagrachhari Sadar Hospital,” la ïathuh u deputy inspector general jong ki pulit, u Ahsan Habib, ha ki nongthoh khubor.
U nongthoh khubor na ka thaiñ uba la ïoh ban ïakynduh da ka PTI u la ong ba ki doktor ha katei ka hospital ki dang shu pynthikna biang ïa ka jingpdiang ïa ki metïap.
Hynrei ki la kyntait ban batai bniah la kitei kiba ïap ki dei ki riewlum ne ki Bengali.
“Ki bor synshar ki la pyntreikam ïa ka kyndon 144, hynrei ka jinglong jingman kaba long kum ka pakhang shnong ka don ha ka nongbah Khagrachhari namar ba ki briew ki kham kwah ban sah hapoh ïing namar ka jingtieng ïa ka jingmih ki jingïakynad kiba nang jur shuh shuh,” la ong u nongthoh khubor ba rangbah jong ka katei ka thaiñ.
Ka jingpynbna jong ka tnad kam pohïing kaba la pynmih ha ka janmiet jong ka Sngi U Blei ha Dhaka ka la pynpaw ïa ka jingsngewsih halor ki jingshah pynmynsaw bad ka la kular ban shimkhia ïa ka aiñ pyrshah ïa kito kiba donkti hadien ka “jingtohkit kaba mardor” da kaba bynrap “ym don ki nongleh kam sniew ki ban lait” bad ka la kyntu ïa baroh ban shong shngaiñ bad ban ïaishah.
