Shillong, Nailur 29
U Chief Secretary u ban sa shongthait noh na ka kam, u Bah D.P. Wahlang ha ka Lah Sngi U Blei u la ong ba ka jingthmu halor ka jingpyntreikam ïa ka projek lynti rel ka donkam ïa ka jingïamir jingmut kaba bniah bad baroh ki nongshim bynta ban pyntikna ba kano-kano ka rai ka ban shim kan long ka jingmyntoi ïa baroh.
Katkum ka jingong jong u, ïa ka sienjam kaba skhem lah ban shim tang lada baroh ki liang ki sngewtikna ba kan dei ka jingmanbha bad ka jingmyntoi ïa baroh.
“Ka lynti rel ka dei ka mat kaba ngi donkam ban don shibun ka jingïamir jingmut bad baroh ki nongshim bynta bad shisien ba baroh ki tip ba la ka dei ka jinglong-jingman ha kaba baroh ngin ïoh jingmyntoi bad baroh ki sngewskhem ba kan dei ka jingmanbha bad ka jingmyntoi ïa baroh, te hangta ngi lah ban shim ïa ka sienjam kaba skhem haba ïadei bad kata ka bynta,” ong u Bah Wahlang haba kren sha ki nongthoh khubor.
Halor ka jingdheng kali, u la ong ba kam don ka lad jingpynbeit kaba kloi haba ïadei bad ki jingeh jong ka dheng kali khamtam ha nongbah Shillong.
U la pyntip ba ka Sorkar ka dang wanrah ïa ki buit treikam kiba shipor, kiba pdeng bad kiba kham slem ban pynbeit ïa kane ka jingeh.
U Bah Wahlang u la ong ruh ba ka Sorkar ka dang shna ïa kiba bun tylli ki jaka pynïeng kali ban pynduna ïa ka jingkhapngiah ha ki surok nalor ka jingïatreilang bad ki Dorbar Shnong ban pyntreikam ïa ki lad ki lynti ban pynïeng kali ha ki katto-katne ki jaka.
U la ong ba la shim ïa ka rai ban pynsangeh noh ïa ki kali kiba la rim, ka ban ïarap bad pynduna ïa ka jingbun ki kali ha surok.
Ki katto-katne ki projek surok thymmai, kiba kynthup ïa ka ‘Western Bypass’, ka ‘High-Speed Corridor’, bad ka ‘Tura Bypass’, la dep ban mynjur ban pynduna ïa ka jingdheng kali.
“Ka dei ka jingeh ka ban shim por khyndiat ban pynbha. Ym don ka lad kaba kloi ban pynbeit ïa kane. Ngi hap ban ïaishah. Peit ïa ka jingbun ki kali kiba pynrung kyrteng ha ka shisngi, ka la kiew sha ki spah tylli mynta naduh 3-4 kumba 20 snem mynshuwa. Kumta, ngi hap ban long kiba la pynkhreh bad nga tikna ba ngin sa lah ban ïohi ïa ka khana kaba bha ha kawei ka sngi,” u la ong.
U Bah Wahlang u la pynpaw ruh ïa ka jingangnud jong u ban leh kham bha ban shimkhia ïa ka mat ba ïadei bad ka Wah Umkhrah. U la kdew ïa ki jingpyrshang ba la leh ban pynbha ïa ka jinglong-jingman ka um bad ban pynitynnad ïa katei ka jaka bad ong ba ka Sorkar ka la pynlong ïa bun ki jingïalang bad ki shnong ban weng ïa katei ka jingeh.
Ka la don katto-katne ka jingmanbha ha ka jinglong-jingman jong ka um, kumba la peit bniah da ka Pollution Control Board, u la ong bad bynrap ba ki jingtrei ki dang ïaid shakhmat ban pynitynnad ïa katei ka jaka, kiba la khmih lynti ban pyndep hapoh shisnem.
Halor ka mat ba ïadei bad u drok, u Bah Wahlang u la ban jur ïa ka jingdonkam ban don ïa ka rukom treikam kaba bun rukom kaba kynthup ïa ki nongshong shnong bad ki nongshim bynta.
U la ong ba ki pulit ki don ïa ka kynhun ‘Anti-Drug Squad’ kaba trei ban ïakhun pyrshah ïa katei ka jingeh.
“Ngi dang peit ruh ïa ka projek DREAM kaba la thaw ar snem shiteng mynshwa (ban weng ïa kane ka jingeh),” u la ong.
Na ka liang ka Sorkar ka la pynbun ïa ki Rehabilitation Center ban ai jingsumar na bynta ki nongdih drok. Shuh shuh u Bah Wahlang u la ban jur halor ka jingdonkam ban ïatreilang bad ki paidbah, ki kynhun niam, bad kiwei-kiwei ki nongshim bynta ban syllok ïa kiba ngat ha une u jingdih pynbuaid bad ban shimkhia ïa kane ka jingeh.
