Beijing, Nailur:
Ka jingthmu sam visa ba thymmai jong ka China kaba thmu ban khring ïa ki riew shemphang ha ka liang ka teknoloji nabar ri ka sdang mynta ka taiew, ka sien jam kaba la ïohi ba ka long ka jingkyntiew kaba khraw ïa ka spah jong ka China ha ka jingïakhun pyrshah jong ka ha ka saiñ hima- sima bad ka United States namar ka polisi visa ba thymmai jong ka US ka pynlong ïa ki nong-aplai visa ban ïakhun ban wad ïa kiwei pat ki lad ki lynti.
Katba ka China kam duna ïa ki enjiniar ba tbit jong ka ri, kane ka prokram ka dei shi bynta jong ka jingpyrshang jong ka Beijing ban pyni ïalade kum ka ri kaba pdiang sngewbha ïa ki jingbei tyngka bad ki sap nabar ri, namar ka jingkiew ka jingeh ha ka khaïi pateng namar ki khajna jong ka US ka pyndum ïa ka jingïohi jngai jong ka ri.
Ka China ka la shim ïa ki lad ki lynti ban kyntiew ïa ka jingbei tyngka nabar ri bad ka jingleit jingwan, da kaba plie kham bun ki bynta sha ki nongbei tyngka nabar ri bad ai jingpyllait visa ïa ki nongshong shnong na kiba bun ki ri Europe, Japan bad South Korea bad kiwei kiwei.
“Ka symboh ka long kaba donbor: katba ka US ka pynkiew ïa ki jingkhang, ka China ka pynhiar ïa ki”, la ong u nongïasaid aiñ jong ka tnad wan rung sha Iowa, u Matt Mauntel-Medici, haba kdew ïa ka kyrdan visa thymmai jong ka China, kaba la khot ka K visa, kaba sdang ha ka sngi thohdieng.
