Shillong, Nailur 29
U Myntri Rangbah ka Jylla u Conrad K Sangma ha ka sngi Nyngkong u la pyllait paidbah ïaki kali ‘DFS Crime Scene Vehicles’ na ka bynta baroh ki 12 tylli ki District jong ka Jylla. Ïakine ki kali yn pyndonkam da ka forensic unit jong ka tnat Pulit ka Meghalaya.
Ha kane ka sngi, na ka liang jong u Myntri Rangbah u la plie ruh ïa ka ophis treikam jong ka Anti-Terror Squad (ATS) jong ki pulit ka Meghalaya.Ka jingthaw ïa ka ATS ba kyrpang, ka long ban peit beit thik tang ïa ka jingtehlakam ïa ki kam lehnoh ha Jylla.
Kham hadien na ka liang jong u Myntri Rangbah ka Jylla ha ryngkat bad u Symbud Myntri Rangbah ba khmih ïaka tnat Kam Pohïing u Bah Prestone Tynsong, ki la shong ïa ka jingïalang bishar bniah ba shisien shisnem bad ki SP bad CO ha Police Headquarter Shillong.
Ha kane ka jingïalang la pyllait paidbah ïa ka MEGPOL, kaba dei ka buit wad bniah ba katkum kane ka juk na ka bynta ki pulit ka Jylla bad ka Personnel Information Management System (PIMS).
Haba kren sha ki lad pathai khubor hadien ka jingïalang, u Bah Prestone ula ong ba ka ATS ka dei ka kynhun ba kyrpang ka ban khlieh da u Deputy Inspector General of Police (DIG) bad ka kamram jong ka, ka long ban khmih ïa kino kino ki kam ba ïadei bad ki jingbyrngem pyntriem ki kynhun lehnoh, kynthup ka jingbyrngem pynbthei bom bad ki riew ishan khmat hapoh ka Jylla.
Ka Sorkar Jylla kala thaw ïa ka kynhun Anti-Terror Squad (ATS) ba kyrpang, ka ban peit beit thik tang ïa ka jingtehlakam ïa ki kam lehnoh ha Jylla.
“Ka ATS ka dei ka Cell ba treikam la ka jong, ka ban shimti bad leh eiei halor ki jingbyrngem pyntriem ki lehnoh, ban pynthikna ïa ka jingshngaiñ bad jingïada ïa ka Jylla. Kane ka kynhun ka dei kaba la pyntbit ban leh eei halor ka jingbyrngem pynbthei bom bad ki song ba suba buh bom,” ula ong.
Haba kylli la ka ATS ka ïasyriem kum ka National Security Guard (NSG), u Bah Prestone ula pynshai ba katba ka ATS ka dei ka kynhun ba kyrpang hapoh ka Police Headquarter, kam donkam ba kan ïasyriem bad ka NSG. Hynrei, ka ATS kan ïoh lut ïa ki jingdonkam ban lah tem kham bha ïa ki kam pyntriem ki lehnoh.
Halor ka jingdon briew, u Bah Prestone ula ong ba ka tnat Pulit ka dang pyndonkam mynta da ki Pulit bala don lypa, hynrei ka jingthungkam kan dang ïaid ban nang pynkhlaiñ ïa ka tnat. Ula kular ba ki kam ba ïadei bad ka jingthungkam kala don ha ka bynta ba khatduh eh bad kan ïarap ban nang pynbun ïa ka jingdon briew hapoh ka tnat Pulit, kynthup ka ATS.
Haba bynrap, u DIG ka Eastern Range Davies NR Marak ula ong ba ka ATS kan dei ka specialized agency ka ban khmih ïa baroh ki kam kiba ïadei bad ki kam lehnoh, kynthup ki jingkhynra, ki jinglum khubor syntiat bad ki jingtohkit.
U Marak ula batai ba katba ka tnat Pulit kala don ïa ki Unit bapher bapher ban peit ïa ki kam bapher bapher, ka long kaba donkam ban don ïa ka Unit ba la pyntbit ka ban pynleit jingmut beit thik tang ïa ki kam lehnoh.
“Kane ka dei kaba la buh daka MHA ban thaw ïa ki Unit ki ban khmih ïa ki kam lehnoh, la ka dei ka jingkhynra, la ka dei ka jinglum khubor syntiat, la ka dei ka jingtohkit bad kiwei kiwei. Kumta, da kaba buh ïa kane ha ka jingmut jingpyrkhat, ngi la thaw ïa ka ATS ka ban khmih beit thik tang ïa ki kam lehnoh,” ula ong haba bynrap “Ka ATS kan don artylli ki Unit-kawei ka ban khmih ïa ki kam ïakhun lehnoh ha khlaw bad kawei ki ban ïakhun lehnoh ha ki jaka sor. Kane ka Unit kan treikam ha ri-lum Garo bad kin ïoh ïa ki tiar ïaleh kiba khlaiñ, ki jinghikai pyntbit bad kiwei kiwei”.
Kane ka jingïalang kala sakhi ïa ki jingai jingbatai bad ka jingïasyllok halor ki mat bapher bapher kynthup ka Cybercrime, ka aiñ kam bymman ba thymmai, ki jingpyrshang ban tehlakam ïa ka jingrung beaiñ ki mynder ri bad ki sienjam ba donkam ban shim ban ïakhun ïa ka jingwan rung u drok.
