Shillong, Nailur 29
U Commissioner & Secretary ka tnad pule-puthi, u Vijay Kumar Mantri ha ka Lah Sngi U Blei u la ïakynduh ïa ki nonghikai ‘Adhoc’ kiba don hapdeng ka jingïakhih hapoh ka lama jong ka Federation of Adhoc School Teachers of Meghalaya (FASTOM), kiba la pynlong ïa ka jingïakhih shong kyllaiñ mungor ba khlem buh por kaba la ïaid mynta la 192 kynta.
Ki nonghikai ki la rai ban bteng ïa ka jingïakhih haduh ba ka Sorkar Jylla kan pdiang ïa ka jingdawa jong ki ban kyntiew kyrdan ïa ki skul ‘Adhoc’ sha ka kyrdan ‘Deficit’.
“U (Mantri) u la kular (ïa ngi) ban pule bniah ïa ki jingdawa jong ka Synjuk”, la ong u Publicity Secretary ka FASTOM, u Bah E.G. War.
Ïa kane ka rai ban bteng ïa ka jingïakhih la shim hadien ba ka kynhun jong ka Synjuk ka la pynpaw ïa ka jingbym hun halor ka jingïalang kaba dang shen bad u Myntri ka tnad pule-puthi, Bah Lahkmen Rymbui, uba la pynpaw ba ka Sorkar kan sa bishar bad khmih bniah ïa ki jingai jingmut bapher-bapher ha kaba ïadei bad ka jingthmu ban pynbeit ryntih ïa ki kyrdan jong ki skul ha ka Jylla, hashuwa ban poi sha ka rai.
Katkum ka jingong u Vice-President ka FASTOM, Bah S. Jungai, ka jingtyrwa ïa ka Meghalaya Education Grant (MEG) ka dang don ha ka kyrdan kaba sdang, bad ki nonghikai ‘Adhoc’ ki dang artatien halor ka jingpyntreikam ïa ka.
“Kum ki nonghikai ‘Adhoc’, ngim tip shai la yn pyntreikam ne em ha kaba kut. Kumta, ngin ïeng skhem bad ka jingdawa ba kongsan jong ngi, kata ka long ban kyntiew kyrdan ïa ki skul ‘Adhoc’ sha ka rukom jong ka ‘Deficit’,” u la pynpaw. Ki nonghikai kiba don hapdeng ka jingïakhih ki la pynpaw ïa ka jingsngewsih halor ka jingbym don ka jingpyntip kaba tikna na ka Sorkar watla ki la dep ban phah hynriew tylli ki jingpynkynmaw sha ka ophis u Myntri Rangbah ka Jylla.
“Ngin bteng haduh ba u Myntri Rangbah un jubab ïa ki jingdawa jong ngi,” ki la ong.
