Shillong, Nailur 29
U Chief Secretary ka Jylla u ban sa shongthait noh na ka kam, u Bah D.P. Wahlang haba pyrkhat sani halor ka jingshakri jong u kaba lai snem bad ar bnai, u la pynpaw ïa ka jingsngewhun haba ïadei bad ki thong kiba u la kynjoh.
“Nga la pyndep lai snem bad ar bnai kum u Chief Secretary jong ka Jylla. Haba nga phai dien biang mynta, nga sngew ba ka don ka jingsngewhun ha kine ki lai snem ba la dep (naba) kino-kino ki thong bad ki jingthmu kiba nga la don naduh kaba sdang jong ka jingshakri jong nga, nga la lah ban pyndep ïa kiba bun na ki da ka jingsngewhun kaba dap pura,” ong u Bah Wahlang haba kren sha ki nongthoh khubor da kaba kdew ba kane baroh ka dei namar ka jingkyrshan ka kynhun jong u, ka longïing bad ki nongïalam saiñ pyrthei ha ka Jylla.
Ka samoi treikam jong u Bah Wahlang kum u Chief Secretary kan kut noh ha ka Sngi Ba-ar, ka 30 tarik Nailur bad ha ka jaka jong u, yn shimti da u Dr. Shakil Ahammed, uba bat mynta kum u Additional Chief Secretary ka Jylla.
U Bah Wahlang u la kdew ba ka jinglong-jingman ka shong suk shong shngaiñ ha ka Jylla ka long kaba bit ba biang ha ka por jong u, lait noh tang katto-katne, kynthup ïa ki jingïakynad khappud bad ka Assam bad ki mat ba ïadei bad ka Bangladesh.
“…Nga la long uba kham donbok ha ka jingmut ba na ka liang ka suk ka saiñ, ka la long kaba kham biang. Ki don hi ki katto-katne hangne-hangtai. Nyngkong eh ka dei ka jingïasiat ha ki jaka khappud bad ka Assam, ha kaba ngi la hap ban pynsangeh noh ïa ka tamasa ‘Cherry Blossom’ bad ki jingïakynad kiba la jia shisien lano sha shiliang khappud bad ka Assam bad hadien kane, ka mat halor ka Bangladesh ruh ka dei kawei ha kaba ngi la hap ban shim ïa ki sienjam kiba mardor. Hynrei lait na kata, haba ïadei bad ki kam lehnoh, ka la long kaba suk ba saiñ bad wat ha Shillong, Jowai bad Tura ruh ka jinglong-jingman ka la long kaba bit ba biang. Kumta, nga sngew ba ka por jong nga ka long kaba kham biang bad ka bym da don than ki jingeh.”
Une u Chief Secretary u ban sa shongthait noh u la pynpaw ïa ka jingdonkam ban pynbeit ryntih ïa ka rukom pynïaid kam ha Secretariat bad ki Directorate, da kaba pynleit jingmut ha ka ‘Capacity Building’ bad ka jingpynbha ïa ki ‘Service Rule’.
Katba u Bah Wahlang u la pyni ïa ka jingsngewrit ban pynpaw ïa la ki jong ki jingjop, u la kdew ba ki para nongtrei bad kiba hapoh jong u ki lah ban ai ka jingpynsngew kaba kham bha halor ka kam jong u.
Ha kawei ka liang u la kdew ba u la shimkhia ïa ka mat ha ka ban pynbeit ïa ka rukom pynïaid kam bad ban pynbha ïa ki ‘Service Rule’ ha jan baroh ki tnad treikam ha kine ki lai snem ka jingshakri jong u.
Ka khubor na u Bah Wahlang sha ki para nongtrei ka long ban trei minot da ka jingaiti lut bad ka jingsngewrit, da kaba ithuh ïa ka jingktah jong ki rai ka Sorkar ïa ka jingim jong ki nongshong shnong.
U Bah Wahlang mynta u dang pynkhreh ïa ka kam bathymmai jong u kum u Chairman ka Food Commission. U la pynpaw ïa ka jingangnud jong u ban pyntikna ïa ka jingpyntreikam hok jong ki prokram bapher-bapher kiba ïadei bad ka bam ha ka Jylla.
