Shillong, Nailur 29
Ka jingbym buh kyrtong ka liang pyrshah ban ïakhun ïa ka ilekshon ban jied ïa u Chief Executive Member(CEM) ha kane ka kynti ba mynta, ka long namar ba kam dei ka ilekshon kaba hap ban ïatan tyllai kum ha ki ilekshon ba julong man ka por.
Ïa kane u Bah Titosstarwell Chyne MDC ka Sohra Constituency uba long ruh u nongïalam ka liang pyrshah ha Khasi Hills Autonomous District Council (KHADC), u la pynpaw ha ka jingïakren bad ki nongthoh khubor ha ka 29 tarik Nailur, hadien ba u Secretary sha ka Khasi Hills Autonomous District Council u Bah Balentine Sohtun u pyntip ba don tang uwei ba thep kyrteng ha ka ilekshon CEM.
U Bah Chyne u la ong, haba don ka jingïa bujli CEM ka ju don ka jingïatan tyllai lane ka jingïa phet ki MDC na kawei party sha kawei pat ka party, hynrei kane ka ba jia mynta ha KHADC ka dei ka ba ym poi pyrkhat bad ka dei ka kam shi ïing ka party Voice of the People Party kaba bat ïa u lakam synshar ka Council.
U Bah Chyne u la ong, “ha kaba kum kane ka jingjia, ka liang pyrshah kam sngew donkam ban ïakhun ïa ka ilekshon ban jied ïa u CEM ba thymmai ka KHADC namar kane ka kaba jia mynta ka dei tang ka jing ïa bujli shuki hapoh ka party VPP, hynrei jait ba la risaiñ u nongïalam jong ki, ka rule kam shah ban shu bujli khlem ka ilekshon, na kata ka daw hap ban ïaid katkum ka AD rule ban pynlong da ka ilekshon.”
U Bah Titos u la ong ba ka liang pyrshah kam kwah ban pynthut eiei ïa ka jingïa bujli shuki jong ki bad na ka liang jong ki, ki ai ka jingkyrshan ba pura kumba ki la leh ha ka jingjied ïa u Bah Shemborlang Rynjah.
Shuh-shuh u la ai ka jingkitbok kitwriang ïa u Bah Shemborlang Rynjah uba don mynta hapdeng ka jingshitom, ba un ïoh noh ka met kaba koit ba khiah.
