Jowai, Nailur 29
U Myntri ka tnad ïalehkai ka Sorkar Jylla u Bah Wailadmiki Shylla u la pynbna ba yn sa sdang noh ka jingpyntrei ïa ka jaka shong jong ki paidbah ne ka gallery ha ka Kiang Nangbah Stadium.
“Ka Sorkar kan sdang noh ka jingpyntrei ïa ka gallery ha Kiang Nangbah Stadium khnang ban pynsuk ïa ki nongpeit,” la pynpaw utei u Myntri thymmai ba dei khmih ïa katei ka tnat ha ka jingïalang pynkut noh ïa ka lympung ïalehkai 6-Aside Football Tournament ba la pyniaid da ka NPP Primary Unit Mission Compound, Jowai ha ka 25 tarik mynta u bnai.
Ha katei ka jingïakhun final kaba la long ha madan Biar Skur kaba ha Jowai, ka Lumsawe (Dulong) ka la long ka lahduh hadien ba ka la pynliem noh ïa ka Chilliangraij da 3-2 kol.
Nalor utei u Myntri, la ïadon lang ruh u MDC ka JHADC u Bah Jesse Suïam, u Waheh Shnong ka Lion Mission Compound Bah D.H. Synrem nalor kiwei pat.
Hadien ka jingïalehkai u Myntri ula sam khusnam sha ka kynhun lahduh bad kynhun ba wan ba-ar da ki trophy ryngkat ki song pisa kumjuh ka khusnam Best Player sha u Da-o-chwa Shylla bad nam Best Goalkeeper sha u Diangheimon Kyndiah.
