Shillong, Nailur 29
Ka Sorkar Jylla ha ka sngi Nyngkong ka la pynkup burom ïa ka Special Investigation Team (SIT) ba la lamkhmat da u Superintendent of Police (City) Bah Herbert Kharkongor na ka bynta ka jinglah ban pyndep ïa ka jingtohkit ha ka por ba lyngkot halor ka jingjia shah pynïap jong u Raja Raghuvanshi.
Ïa kane ka prokram pynkup burom la pynlong ha Police Headquarters, ha kaba la ïadon lang da u Myntri Rangbah ka Jylla u Conrad K Sangma, u Symbud Myntri Rangbah ba khmih ïa ka tnat Kam Pohïing u Bah Prestone Tynsong, kiba la ïaroh ïa ka jingtbit bad ka jingaiti lut jong ka kynhun pulit.
Kiba la shah pynkup burom ha kane ka sngi ki kynthup ïa u nongïalam ka SIT uba dei ruh u SP (City) Bah Herbert Kharkongor, u officer-in-charge ka Sohra Bah Anthony Khongsit lem bad kiwei ki dkhot ka SIT.
Ki pulit ka Meghalaya ki la kem ïa ka kurim jong u Raja, ka Sonam Raghuvanshi, na ka bynta ka jingkynnoh jong ka jingdonkti ka jong ka ha ka kam pynïap ïa la u kurim ryngkat bad ki paralok jong ka na Indore, Madhya Pradesh.
U Raja Raghuvanshi u la shah pynïap ha u bnai Jymmang ha jaka pynïeng kali kaba don ha Kshaid Weisawdong. Ka SIT ka la pyndep ïa ka charge-sheet halor kane ka mukotduma ha bnai Nailar, mynta u snem.
