Shillong, Nailur 29
Ka Mylliem Lum ka la long ka lahduh ha ka Second Division Football League 2025 ba la pynïaid da ka Shillong Sports Association, hadien ba ka la pynliem noh ïa ka Laitkyrhong lyngba ka tie-breaker da 4-3 kol ha ka jingïakhun final kaba la long ha ka sngi Saitjaiñ ha SSA Stadium kaba ha First Ground, Polo.
Lyngba kane jingïoh rung sha ka final, kine ki ar tylli ki kynhun ki la kiew kyrdan sha ka First Division bad kin ïoh ban shim bynta naduh u snem ban wan. Te kumta ka Mylliem Lum kum ka lahduh, ka la ïohpdiang ïa ka khusnam pisa kaba T. 1 lak, katba ka Laitkyrhong ka la ïoh T. 50 hajar.
Ka Mylliem Lum ka la jop lut ïa ki hynriew tylli ki jingïakhun mynta ka samoi haduh ka sngi Saitjaiñ. Kumjuh ruh ka Laitkyrhong ruh ka khlem shah rem ha kane ka samoi, watla ka la ïakhaid ar tylli ki jingïakhun jong ka.
Haduh kaba kut ki 90 minit kine ki kynhun kim shym la lah ban thep kol wat haduh ka extra time. Dei ha jingïashut ïa ka tie-breaker ba ka Mylliem Lum ka la lah ban tam ïa ka liang pyrshah da 4-3 kol na ka bynta ban khur syndon ïa ka jingjop.
U Banïaineh u la ïohpdiang ïa ka nam Player of the Final, katba u Shaitborlang u la khur ïa ka nam Top Scorer hadien ba u la thep phra kol ha kane ka aïom.
Ïa ki khusnam sha ki kynhun la sam da u President ka Meghalaya Football Association u Bah Hamletson Dohling kum u kongsan ha ka jingdon lang ki nongïalam ka SSA.
