Shillong, Nailur 29
Ka World Tourism Day ka long ka sngi kaba kyrpang na ka bynta ki riew paidbah, ki jaka pule, ki jaka trei, ki nong sengkam, ki nongaikam kiba ïadei ha ka liang ki kam jngohkai pyrthei.
Kumba ju leh man la u snem, sa shisien ha kane ka kynti ruh, ka tnad Tourism bad Travel Management jong ka ICFAI University Meghalaya ka la rakhe ïa kane ka sngi da kaba pynlong ïa ka prokram kaba kyrpang ha ka shnong Mawlyndep, Ri-Bhoi District, ha ryngkat ka jingïatreilang bad ka India Tourism Shillong, Ministry of Tourism, Government of India bad ka Shnong.
Ha katei ka sngi la ïashim bynta ïa ka jingrakhe da ki khynnah samla pule jong ka University bad ki nongshong shnong, ha ryngkat ka jingdon lang ka Vice Chancellor ka University, ka Dr. Alicia Gatphoh, u Rangbah Shnong, u Bah J. Kharbuki bad u Bah Jason Sawkmie Mawlong, uba long u Kongsan ha katei ka sngi.
La ïoh ka jingkren kyrpang bad jing pynsngewthuh ha ka liang ka tourism na u Bah Ian A. Lyngdoh, uba la paw khmat ha ki kam jngohkai pyrthei, bad na U President ka West Jaiñtia Hills District Adventure Sports and Mountaineering Club, u Bah Sambor Surong. La pynshongkun shuh-shuh ïa ka prokram lyngba ki jingshad bad ki jingrwai ba la thaw kyrpang da ki khynnah skul ka University bad ruh da ka jingrwai kyrpang jong i heprit Judy H Syiemïong iba dei na katei hi ka shnong.
Ha katei ka sngi ha dien ba la kut ka prokram, ka la don ruh ka jingpynkhuid shnong ba lyngkot, kum shi bynta ban rakhe ïa ka Swaachta Hi Seva bad ruh ka jingïa thung dieng kum ka dak ka jingkynmaw ïa ka NSS Foundation Day da ki khynnah pule ka University.
