Khliehriat, Nailur 29
Ka Byndihati CSC ka la jam sha ka semi final ha ka lympung ïalehkai 1st Division Football Tournament ba la pynïaid da ka East Jaiñtia Hills District Sports Football Association (EJHDFA) bad kane ka la wan hadien ba ka la pynliem noh ïa ka Rymbai Madanpyrriang SC da 3-1 kol.
Ha kane ka jingïalehkai quarter final kaba la long ha madan artificial turf Diengshynrum, Khliehriat, ka Byndihati ka la ïalehkai bha naduh kaba sdang ha kaba ka la ïoh ban pynkhih jar nyngkong eh lyngba u Tenligent Dkhar ha ka minit kaba 32. Ïa kiwei pat ki kol la thep da u Lungouhao Hangshing ha ka minit kaba 42 bad kawei lyngba ka penalty (90+3). Na ka liang ka Rymbai Madanpynriang ka la pynphai kylla shi kol lyngba u Rapporme Dkhar (63).
Hapdeng ka jingïakhun ki arliang mamla ki la ïohpdiang mar kawei ka red card hadien ba ki la ïoh mar ar tylli ki yellow card.
