Jowai, Nailur 29
Ka West Jaiñtia Disrict Sports Association (WJDSA) ha ka lah sngi U Blei ka la sdang ïa ka lympung ïalehkai 1st Division Football Tournament na ka bynta ka 13th Chatister Kharkongor Memorial Trophy ha Kiang Nangbah Stadium, Jowai.
Ha kane ka lympung la don 9 tylli ki kynhun ha kaba la phiah ïa ki ha ki ar tylli ki group kata ka Pool A bad B.
Ha ka Pool-A ki long ka Nangbah Dukhu SC, Sabahmuswang SC, Dulong SC, Mynthong SC bad ka Madan Thadmuthlong. Katba ha ka Pool-B ki long ka Lion Sports & Youth Affairs, Lumiawmuchai Shangpung SC, Khliehïongriang SC bad Nangbah Ïawmusiang SC.
Haba phai sha ka jingïalehkai jong kane ka sngi sdang hapdeng ka Nangbah Dukhu bad Sabahmuswang SC ki la ïasam mar shi point hadien ba ki la ïakhaid mar 1-1 kol.
Ka Sabahmuswang SC ka la pynkhih jar nyngkong ha ka minit 21 lyngba u Lakhon Dkhar, hynrei dei ha ka kylla miet ba ka Nangbah Dukhu ka la pynphai kylla ha ka minit 61 lyngba u Shaimon Padit.
Kane ka lympung kan bteng biang ha ka sngi Ba-ar ha kaba ka Lion Sports & Youth Affairs kan ïakhun pyrshah ïa ka Lumiawmuchai Shangpung ha ka por 2 baje nohphai sngi.
